Popular Bible Verses from Luk 3

Share

Tuulbʼaletz uvaʼs yeʼnaqich aqʼaxoq jaʼ Xhun t-tzeʼ, tul mamala xaol nikich taqʼ kuʼ Xhun xeʼ aʼ. Tul ant Jesuus aqʼax kuʼ xeʼ aʼ taʼn Xhun. Yaʼne inatxh Jesuus quBʼaal Tiuxh, tul jaqp u amlikaʼ.{*} Tul yekich kuʼl viTiuxhil Tiuxh tiibʼa Jesuus, uvaʼ echich vichʼij, eche invaʼq paraamuxh. Tul yolon tzaan quBʼaal Tiuxh t-amlikaʼ. Tul ech tal s-eche: —Axh inKʼaol. Kamxh in seʼe. Tul tira nik achiibʼisa vaanima, —xeʼt quBʼaal Tiuxh te Jesuus.

Yaʼne ech tal Xhun te jankʼal inqʼa xaol s-eche: —Yeʼle. Jit aʼ ine u Kriisto. Bʼantan il jolol ex qʼaoq, nik vaqʼ kuʼ ex xeʼ aʼ. Pet ech koq u Kriisto, uvaʼ yaʼn tul s-viʼ, sibʼxh palnaʼql tiqleʼm naq sinviʼ. Tul jitoq inkʼulel uvaʼ laʼ inchiteʼl kʼaʼil ichichʼ xaʼp naq t-toq. Tan aʼ vet viTiuxhil Tiuxh laʼ taqʼ sete; atz laʼ taqʼ xamal.

Pet aʼ ekʼutxh inqʼa bʼaʼnla bʼanoʼm. Tul ech ex ebʼan, eche viʼoq tzeʼ uvaʼ laʼ taqʼ bʼaʼnla ivatz. Tul yeʼ etitzʼa uvaʼ laʼ elaʼp ex tibʼaʼnil tiʼ kuxh uvaʼ ex tij imam Avraʼaam. Tan oq laʼ isaʼ te quBʼaal Tiuxh, tul laʼ taqʼ bʼen inqʼa sivan inqʼae s-tijaq imam Avraʼaam. Pet bʼaxa etitzʼa etibʼ t-inqʼa epaʼv vatz quBʼaal Tiuxh. Tul jikbʼavaq etibʼ.{*}

Tan oq yeʼle, tul toq ikʼaxbʼisa ex quBʼaal Tiuxh tiʼ inqʼa epaʼv. Eche invaʼq u vinaq uvaʼ atoʼk kʼoxbʼal tiqʼabʼ, tul bʼanel kuxh vet tutxh tiʼ ikʼonox u tzeʼ uvaʼ yeʼ nik taqʼ bʼaʼnla ivatz, tul laʼ toksa t-xamal. Echetz uvaʼe, laʼ ulbʼel ex, —chichich Xhun.

Aʼetz ex elaʼpunoq u yol tiibʼa Xhun uvaʼ tzʼibʼamal ka taʼn Isaiias, u qʼexsanich tetz viyol quBʼaal Tiuxh, val u yol uvaʼ ech nik tal s-eche: —Jatvaʼlxh inqʼa xaol uvaʼ nik ipal tu txʼavaʼ uvaʼ yeʼl xaol jeqlel s-tuul, laʼ motx tabʼi val u yol laʼ sichʼinsal el s-viʼ uvaʼ ech laʼ tal s-eche: «¡Jikbʼavaq etibʼ tiʼ ikʼulux u quBʼaal uvaʼ tuleʼ! Tul ech ejikbʼat etibʼ eche ijikbʼixsal invaʼq bʼey uvaʼ koyel kuxhtuʼ tiʼ ikʼulux tul vaʼq mam iqʼesal. Tul ech laʼ ejikbʼat etibʼ eche laʼ inojsal invaʼq xoʼl vitz, atz eche laʼ teleʼl iviʼ invaʼq vuqʼkin pejoʼn, atz invaʼq tal vitz, tul laʼ bʼen s-txhaqʼaala. Atz echatxh laʼ ejikbʼat etibʼ, eche laʼ ijikbʼal invaʼq bʼey uvaʼ yeʼ atoʼk s-jik; atz eche ibʼanax tutxh invaʼq bʼey uvaʼ vuqʼel kuxhtuʼ. Tan aʼ isaʼ quBʼaal Tiuxh laʼxh tootzaqi inqʼa xaol s-kaqaayil kam laʼ ulbʼel ichitix t-inqʼa ipaʼv,» —chich u yol.