Popular Bible Verses from LUCAS 6

Share

Mangtedcayo ket maiccancayto; sucat a naimbag, napenpen, nasedsed ken agliplippias ti maitedto met iti saclotyo: ta ti rucod a pangrucodyo isunto met laeng ti pacarucodanyo.

Ti naimbag a tao iti nasayaat a gameng ti pusona iruarna ti naimbag; ket ti dakes a tao iti dakes a gameng iruarna ti dakes: ta iti nawadwad iti puso saoen ti ngiwatna.

Ngem ayatenyo dagiti cabusoryo; ket agaramidcay ti naimbag, ket agpabulodcayo a di mangnamnama a pulos ket dackelto ti gonggonayo, ket annacnacayonto ti Cangatoan: ta isu manangngaasi uray pay cadagiti managinlilipat ken managdacdakes.

Agbalincayo coma a manangngaasi a cas ken ni Amayo a manangngaasi.

Ket saancayo nga agipato, tapno didacayto met ipato: ket dicayo mangdusa ket dicayto met madusa: mamacawancayo ket mapacawancayto met

Ngem cunac cadacayo nga agdengdengngeg: Ayatenyo dagiti cabusoryo: agaramidcay ti naimbag cadagiti gumura cadacayo, Agsaocay ti naimbag cadagiti mangilunod cadacayo, ket icarcararaganyo dagiti mangranggas cadacayo.

Ket no casano ti cayatyo nga aramiden coma dagiti tao cadacayo, casta met ti aramidenyo cadacuada.

Ti cumabil kenca iti maysa a pingping, iparangmo pay kencuana ti bangir; ket ti mangala kenca iti cagaymo, dica igawid kencuana ti pagananaymo pay. Ket iccam dagiti amin nga agkiddaw kenca; ket ti mangala iti cucuam, saanmo a dawatenen kencuana.

Ta awan ti nasayaat a cayo a mangted ti bunga a dakes ket awan met ti cayo a dakes a mangted ti bunga a nasayaat.

Ta ti tunggal cayo mailasin iti bungana met laeng, ta saan a macaala dagiti tao ti higos cadagiti espino, ket dida met macapuros ti uvas cadagiti zarza.