Popular Bible Verses from Wafilipi 2

Share

Namutsehenda dzambo ḍiḍeḍyonse na umimi ambu kwa kulacha kudziona. Ela wani na myojo ya umpowe, mukiwahwaa wangine kuwa ḅora zaid̯i kumuchia nywinywi wenye. Kula mumodza jwenu natsemuud̯amia haya mamboye jeje heket̯u ḅasi, ela wamuud̯amiyeni na wenzenu pia.

Wani na mojo dza uuḍe wa Kirist̯o Yesu eokuwa nao.

Ingawa ewa na asili ya Umuungu, ela jeje hukuḍe kuwa sawa na Muungu, nkakukuhwaiya kuwa dzambo ḍya kuḍihabvaka gu. Kwa kutsaka kwakwe jeje mwenye, hayo hayo yonse kayajibat̯a. Kadziweka dza muhumisi, na kawa dza mwanaad̯amu. Na akimaawa dza mwanaad̯amu, kadzisusya nsii, na kat̯ii hat̯a adzepfoakifwa, kifo cha kinyaya muhini mwa mpatsa.

Koro Muungu ndiye eyekuhendani kazi kuzimuni mwenu, apate kumumpa mojo na nguvu za kuhendea hayaḍe yeyonamutsakiza jeje.

Na kwa dzambo hiḍyo, Muungu kamukuzya, na kamuhendeza akae pfantu pfa hila nkuu pfa mwiso. Kamumpa sari ḍiiḍyo kuu kuchia masari yonse. Ndookomu kwa kuḍihila sari ḍya Yesu, kula ḍikihadzwa viumbe vyonse, viivyo mbinguni dzuu, nsii lumwenguni, na hat̯a viivyo lumwengu jwa wafu, ni had̯i vimuvunziye nkuhi. Na kula mumodza anene kwamba Yesu Kirist̯o ni Ḅwana kwa dzambo ḍya kumumpa shad̯u Muungu Baba.

Hendani kula kintu pfasipfo kuḅuguma wala kushindana ili kwamba muweze kuwa wantu wasio t̯amba ambu alano iḍeyonse. Ni muwe dza wana wema wa Muungu weokuishini lumwengu jwa wantu wazuka na wanangikiyeo. Yangaani dza muyanga kahi yao

D̯ubva watsakwa, dza mwiivyomukinit̯ii kut̯wa nipfokuwa pfamodza nanywi, ḅasi hat̯a hivi hivi niivyo kuye nanywi gijani kunit̯ii. Gijani kuhenda mema, mukimushooga Muungu muno kuzimuni mwa maisha yenu ya mupfonyo.