Popular Bible Verses from Marko 6

Share

Nsu likpo lɛni na Yesu ku ama belie ni, bekyuli bani muuduo-ma kudɔ mmɔ taalɛ bemomo. Na Yesu ku nwuna batɛyane balakɛ uwi ɔni na beti badi munu munu. Anwuɔsu Yesu ɔ́su-ma ɔnini, “Bɛya na abu lɛti buteesie kesii kani nse kpoo na butélie mmɔ bɔnwuna blii.”

Yesu ɔ́su-ma ɔnini, “Katɔti kenye udiene ubo ɔbu na kesi kesii. Nsu na nwuna ɔma ku nwuna lɛlɔ bekyuli ku nwuna kaduli bekyuli anumi ni, uuubo ɔbu.”

Ɔni na Yesu ɔ́yu ɔkɔlɔ kemmo ni, ɔ́nu bekyuli lisu lɛmɛni na bana lɛlɔ lɛ́kywi-nwu kaƒɔ, ɔsika bese aani baƒonu bani neeebo lɛlɔ ɔnune. Anwuɔsu úse kalɔ ɔɔtina-ma ala pii taasiku Katɔti litemi lɛlɔ.

Ka nwuna ɔma bekyuli bátaƒɔ-nwu bátadi ɔsu ni, litemi lɛmmɔ líkpoku Yesu. Ɔ́kɛnku ɔmmɔ ɔsu ni, útakana akɔla pii adi bɔbla na mmɔ, ntu ɔni na úti nwuna enu ɔ́sia balɛne badi lɛlɔ na ɔlɛ ɔ́ba-ma. Nwuna kama lɛnɔ ni, Yesu útávi akpaklɔ ani nkya amadɔ mmɔ, na ɔkɛ ɔɔtina-ma litemi buni.

Amu na Yesu úti bodobodo ku kɔkpaku kɔmɛni na ka ɔ́nu katɔ laa ni, ɔ́gya Katɔti enu na ɔ́bwɛ bodobodo ku kɔkpaku kɔmɛni. Na úti úte nwuna batɛyane ɔnii bele bete esu esu ammɔ ƒui. Bana akɔ ɔdi biala ɔ́di na úmo, ɔsika Yesu ɔ́ya adila amɛni émomo ébu. Na ka nwuna batɛyane bála adila ani nébu básala ni, úyi kɔgyigyɛ leevu-inyɔ.