Popular Bible Verses from OHÚTU 32

Share

Anɔ́ɔ ɔ̄cɛ ā da ɔ́ kahíníī, “Iyē kú uwɔ í gáā lé ka Ujékɔ̄pu ɛ́ɛ́ gɛ ŋ́, amáŋ Ísrɛ̄lu nɛ̄ ó wɛ méɛ̄ á.” Ohígbū ka a le unu nu tú Ɔwɔicō mɛ́mla ācɛ, a kē le yálé.”

Anɔ́ɔ ō kahíníī, “Mā um tá, ká n nyɔ̄, eyī gē nyā ɛɛ́.” Amáŋ Ujékɔ̄pu da ɔ́ kahíníī, “N gaá cɛ̄ gā uwɔ nyɔ̄ ŋ́, ń táafu ŋ́, a lɛ ɔhā hɛ́ ce um.”

Amáŋ Ujékɔ̄pu ōfōōfūnū klá igbīhi gbɔ́ɔcī mɛ́ɛ̄ á. Anɔ́ɔ ɔ̄cɛ éyi wā í nunu tú ɔ̄ jāā gbéeko nɛ̄ eyī hile líígí kóō nyā.

Anɔ́ɔ Ujékɔ̄pu kahíníī, “N le Ɔwɔicō má ikpēyī abɔ̄yī um, anɔ́ɔ n yēeyī kpɔ́ áā.” anɔ́ɔ ó kwú iyē ú ce abɔ́ɔ ka “Upɛ́nīyɛl”.

Eko nɛ̄ ɔ̄cɛ ā le má ka anúɔ í yá Ujékɔ̄pu lé glá ŋ́ mā ā, ó le abɔ̄ kwu ikpokwú ákwúta kú Ujékɔ̄pu, anɔ́ɔ ɔ́kwu ā kwú hīlií á.

Anɔ́ɔ ó da ɔ̄ ɔ̄kā kahíníī, “Ɔdī wɛ iyē kú uwɔ ā?” Anɔ́ɔ ó kahíníī, “Ujékɔ̄pu.”

Anɔ́ɔ Ujékɔ̄pu da ɔ́ ɔ̄kā kahíníī, “Lɛ iyē kú uwɔ hī gā um.” Amáŋ ó tóohi kahíníī, “Ɔdíyá nɛ̄ a tíne ō jé iyē kú um ā a?” Anɔ́ɔ ó le ɔhā hɛ́ ce ɔ́ á.

Ń cíkā ɔwɛ dúúmā lɛ odúúdú ogbonɛnɛ mɛ́mla ɛlā ɔkwɔ̄ɔ̄kwɛ̄yi kú uwɔ nɛ̄ a mafú lɛ ami nōo wɛ ɔ̄cocɛ̄hɔ̄ kú uwɔ ā ŋ́. Ohígbū ka, okwutɛ kú um ōfōofūnū, nɛ̄ n bī hɛ́ ísu kú Ujɔ́dan nyā igbó á. Abālɔbányā ā n le pīya ígwu ɛpa ɛɛ́.

Ó kōō wɛ o jāā kwu ícɛ nyā ācɛ kú Ísrɛ̄lu í gē lé ícɛ̄bɛ́ nōo yɔ̄ ɛgiyí ákwúta kú ɛbɛ́ ŋ́, ohígbū ka abɔ́ɔ nēé lɛ abɔ̄ kwu Ujékɔ̄pu á.

Anɔ́ɔ Ujékɔ̄pu le ɔkɔ gbā lɛ Ɔwɔicō kahíníī, “Ɔwɔicō kú ádáádā um, Ébrahām, mɛ́mla ádā um, Áyísīki, pó ɔkɔ kú um! Awɔ da um ká n̄ kwúcē ga ɔlɛ́ ádā um mɛ́mla ɛgiyí aɔ́máapú um á. A kē ka ka anúɔ géē yá um lɔhi.

Lɛ um hɛ́tá ŋmá abɔ̄ kú ɔyínɛ́ um, Ísɔ. N gē yúúfi koó yɔ̄ ī wā gaá kpɔ́fú kwu alɔ kóō kpó odúúdú alɔ yíífi, kwu aɛ́nɛ́ mɛ́mla ayí dúú.