Popular Bible Verses from Akisiakinet 39

Share

Nakaneni arukito Yosep ka Ekapolon Akuj sodi topia ngesi noi. Kiboi Yosep anawi a ekapolon keng, alo a akwap a Misiri.

Kotere ngakiro nguna, kimiekinea Potipa Yosep ngakiro daang ka ibore keng daang toliwor ngesi iyoki. Toliwor Potipa nyemisit ngakiro a ibore a iche, mati akimuj na anyami ngesi. Arai Yosep edia lokebusean tojok akwaan.

Kitiliwo ekapolon a ejela Yosep ekapolon a ngitunga kadaang alu aenitae alojela.

Tolim Potipa atamar yaarae Yosep toinikinae nipalem eananakinio ngitunga a ekapolon lu eeneeneo. Kiboi Yosep kaneni. Nakaneni arukito Ekapolon Akuj ka Yosep topia ngesi, sodi tominak ekapolon a ejela Yosep.

Sodi ani ekisidi tasak aberu a Potipa atamar atopero ka Yosep abu tolimok ngesi atamar atopero. Nakaneni towou Yosep. Tolimok ngesi aberu a ekapolon keng tama, “Kingolik a, nyemisit ekapolon kang ngakiro a ibore a iche kanege anawi ani ayakar ayong nege. Ketiliwo ngesi ayong ekapolon a ibore keng kadaang. Emam itwaan iche epolot anawi kana akidwang ayong. Nabo emam ibore ketengerit ngesi ayong, mati iyong na irai aberu keng. Ekokini tokona ayong asubi akisech naaronon noi naga atosechak Akuj ai?”

Nakaneni ani akolongit apei, na alomarea Yosep kai akisub etich keng loger lopalem, tamam ngikasubak etich luche alokai, toruakin aberu a Potipa eworu keng lo anikalapatan esaki atamar atopero ka Yosep. Nakaneni tamatar Yosep nikalapatan kimiek eworu keng anakan a aberu a Potipa.