Popular Bible Verses from VILINGA 1

Share

Oloze namukatambula ngolo hakwiza Xipilitu wajila hali enu, kaha namukapwanga muvinjiho jami, nakuYelusalema nakuYuleya kwosena nakuSamaliya mbwe nakusongosongo yamafuci.

Avambile ngwenyi, Kacexi cenu kutacikiza myaka najingondeko, vikiko asakula Tata kungolo jenyi.

Omu akungulukile navo avalwezele ngwenyi, Kanda mukafuma kuYelusalemako, oloze muvandaminenunga Uze vamixika lyehi kuli Tata, Uze mwevwa lyehi kuli Ami. Mwomwo camwenemwene Yowano ambapacixilenga vatu mumeya, oloze kamwexi kuhita makumbi amavuluko, numbanyi vamimbapacisenu muli Xipilitu wajila.

Alisolwele nawa wamutonyi navinjikizo vyavivulu kuli vakivo, kufuma kukuyanda cenyi, nakusolojoka kuli vakivo hamakumbi makumi awana, nakuhanjejeka navo vyuma vyakuvuluka wangana waKalunga.

Ikiye hakutulisa kuhanjika mazu awa, ximbu vapwile nakumutala, vamutwalile mwilu, kwejile livwi lyamufwikile, kaha kavamumwene cekako.

Omu vapwile nakuxixika mwilu muze apwile nakuya, kutala kuli vakivo kunemana malunga vavali vakuvwala mahina atoma. Vakivo vavambile nawa ngwavo, Enu malunga vakuNgalileya, munemanyina nakutalila ika mwilu? Ou Yesu, Ou vanafumisa kuli enu vanatambula mwilu, Ikiye mwakeza ceka nganomu munamumono hakuya mwilu.