Popular Bible Verses from YOWANO 15

Share

Ami yami muvinyo, enu mumitango. Ou mwatwamanga muli Ami nayAmi nawa muli ikiye, ikiye vene mwemanga mihako yayivulu, mwomwo cikexi Ami kaci kamwexi kuhasa kulinga cuma cimweko.

Twamenunga muli Ami, nayAmi nawa muli enu. Nge omu nauhona mutango kulimina uvene mihako, kuvanga nautwamanga kumuvinyo, ngoco munamuhonanga cipwenu nawa, kuvanga namutwamanga muli Ami.

Kaci nge namutwamanga muli Ami namazu ami nawa Mwatwamanga muli enu, lombenu cexoco cuma munazange kaha navakamilingilaco.

Kamwexi yenu mwangusakwile Amiko, oloze Ami yami ngwamisakwilenu, kaha ngunamihakeko mangana ngwami, enu muyenga, mwimenga mihako, mangana mihako yenu yikatwamenga, mangana cose cuma namukalomba kuli Tata halijina lyami akamihaneco.

Mutu naumwe pimbi ali nazangi yakuhambakaneyi, mutu hakuvecela masepa jenyi mwono wenyi.

Wose mutango wamuli Ami wakuzeneka kwima mihako mwakautetako, kaha wose weji kwimanga mihako mwautomesa mangana ngwenyi, wimenga mihako yayivulu.

Elu lukiko luximbi lwami ngwami, Lizangenunga navakwenu, nganomu ngunamizangilenu.

Hakiko vene navamutohweselanga Tata, hakwima cenu mihako yayivulu, kaha ngoco namukapwanga mutumbaji twami.

Ami yami muvinyo wamucano, kaha Tata Ikiye Njimi.

Kaci nge mutu kexi kutwamanga muli Amiko, navamumbila nge mutango, mwominyina, kaha vatu veji kuyikongolanga nakuyimbila hakakahya, kaha hinayiwema.

Vyumevi ngunavihanjika kuli enu mangana kuwahilila cami cipwenga muli enu, kaha kuwahilila cenu citemo.

Kaci nge namulamanga jiximbi jami, kaha namutwamanga muzangi yami, nganomu ngunalame Ami jiximbi jaTata, kaha ngwatwama muzangi yenyi.

Vyumevi ngunamilwezevyo mangana mulizangenga navakwenu.

Mwapwanga muvaka-mavu, kaci vaka-mavu vanamizangenu vakwavo. Oloze mwomwo kamwexi muvakamavuko, oloze hakumisakulAmi muli vaka-mavu, xikaho vaka-mavu vanamihungu.