Popular Bible Verses from Matius 6

Share

Anaé, pangérén owo eng Kakolanoan i Amang Kasuruan wo eng kasalé'an-Na, wo pakasa em paperlun iow itu yawes-Na oka ai camu.

Anaé, tioo kamu maindé-indé' andumoro' si endo woondo, ampa'paan si endo woondo awéan eng kaindé-indé'ana in esa. Eng kasusaan sangando aweske' in sangando.”

“Ampa'paan in itu, icua-Ku mangé ai camu, tioo maindé-indé' andumoro' ing katouan iow, andumoro' ing kakanen iow kuma'pa in elepen, wo tioo maindé-indé' andumoro' in owak iow, andumoro' in sapa em pakén iow. Ra'ica réén eng katouan si lébé pentingai wo ing kakanen wo en owak itu si lébé pentingai wo ing karai?

Taan sa kamu sumombayang, muntepo ang kamar iow, palenano em papalen wo sumombayango mangé a si Amang iow si an tampa caenep. Wo in taniitu, si Amang iow si makaséré mai sé caenep, suli'an-Na oka sapa e niéma' miow itu.

Ampa'paan in itu, sumombayango in tana'i, ‘Amang ami an sorga, e ngaran-Mu le'nas wo iparangka-rangka', mayoo si Amang kumawasa tanu Kolano ami, mamualio eng kasalé'an-Mu ang kayo'baan meputé an sorga.

Wéanai kami asi endo anio' kakanen si paperlun ami.

Wo ampunganai eng kamesé-meséaan ami, kaputé ami ka'i mawéé ing kaampungan a si tou si méma' ing kameséaan ai cami.

Wo tioo woo iwali kami muntep am pangepé'an, taan iwekaro mai kami ang kawasa i léwo'. [Ampa'paan si Amango e makaanu ing kakolanoan wo ing kawasa, wo iparangka-rangka' akar ing kauré-uré. Ulit.’]

Sa ampungan iow eng kameséaan sé niéma' é tou ai camu, si Amang iow an sorga ka'i méé oka ing kaampungan ai camu.

Séréno mangé sé burung an langit, sé ra'ica mausew wo ra'ica maupu' wo ra'ica wana paumungan im buéna, taan pengawéanai kanen i Amang iow an sorga. Ra'ica réén icamu en lébé awéan wééna wo sé burung itu?

“Tioo kamu masuun ing kasiyaan torona in owak iow ang kayo'baan, ampa'paan eng kasiyaan ang kayo'baan anio' lolondin oka wo léwoon in taincéré' wo mai egan é rombit e rombiten éra eng kasiyaan itu. Taan umungeno eng kasiyaan iow an sorga, si ra'ica léwoon é lolondi wo in taincéré' wo ra'ica egan é rombit e rombiten. Ampa'paan am bisa eng kasiyaan iow, am bitu ka'i en até miow.

Ra'ica wana esa tou ka'i e ro'na tumawoi a sé rua tuang. Ampa'paan sa tanu siitu, icasuutna oka si esa tuang wo icaupusna si tuang walina, kuma'pa sia le'tek oka a si tuang esa wo ra'ica mapandung si tuang walina. Taniituo ka'i kamu, tantu ra'ica toro sumelewir a si Amang Kasuruan sa memero-merotke' ing kasiyaan ing kayo'baan.”

Sa en dukut am pangumaan asi endo anio' awéan taan woondona mai tiya' an api, taan piniara wo niéma' i Amang Kasuruan pasung. Ra'ica réén icamu en émaan-Na lébé pasung, éi tou sé ra'ipé' talos maéman?

Taan sa kamu méé sapa-sapake', tioo kailekan ing kama ka'biri miow sapa e niéma' ing kama kakan iow. Anaé, en aiwéé miow itu iwééo mangé i maene-enep, wo in taniitu si Amang iow si makaséré mai sé icaenep, suli'an-Na oka ai camu sapa si niéma' miow itu.”

“Ta'néieno mangé, tioo paémaan iow en atoran in agama an dior é tou wosama' sérén éra wo irayo éra kamu, ampa'paan sa kamu maéma' tanu siitu, ra'ica kéréan iow en laasa i Amang iow an sorga.

“Sa kamu mengapuasa, tioo en amo miow susa tanu sé tou punek. En amo éra mapa in susa kéndoon, wosama' sérén é tou sapaoka séra ang karoro'an i mapuasa. En ulitna icua-Ku mangé ai camu, siituo en laasa si kinéréano éra. Taan sa kamu mengapuasa, mu'aso mio' in amo an dano wo ko'koteno mangé em buuk an do'kos iow, wosama' ra'ica kailekan é tou sapaoka kamu ang karoro'an imapuasa, taan wayake' si Amang iow si an tampa ra'ica kaséréan e makailek. Wo si Amang iow si makaséré mai sé caenep, suliin-Na oka mai sapa e niéma' miow itu.”