Popular Bible Verses from 1 Ioane 4

Share

Tore nana nei niro kemahebidio na’i nou turiwa ia biahai, mabu nouri niro kemahebidio na’i, ina nou auwori, nouro tore nana’i tau iwohuodidio, mabu nouri tore naro wiha na airiworoho wia dubu nou tore emahebidiowa, auwo niro kemahebidio na’i nouro ivia biahai.

Mo mere keke, riovia Iehova mereri wia uba oubi naiba rio tau imubiaumo, mabu nouri urio nou riomu remidiodio nou auwori, wia nouri urio nou batibatiwa remidio nou nou aibo biahai.

Imo nouido niro emahebidiomoi mabu nouri nouro imoido opuito niro nou nimahebidio.

Nanaio, imo himia himia niro taremahebidiodaimo, mabu nouri niro kimahebidio nana’i nei Iehova nanari wia niro kemahebidio oubi auwoha nei Iehova kiahomo mereri wia neivia Iehova umori.

Dubu nou niro kemahebidio tatowa nou Iehova umo biahai, mabu nouri Iehova nou niro kemahebidio nari.

Nouri nou naiheha niro kemahebidio na’i; imoo Iehovaido niro emahebidioumo biahai, na’u Iehovaro imoido niro nimahebidioro wia nou himia Mere nouro naibaha otiodoiro, imo ubauba kidia tiwo na’i nou aibo.

Nanaio, ina Iehovaro imo niro nou rimahebidioro, nou aibo imo himia himia niro keremahebidioiha eremahebidiomoi.

Iehova niro kemahebidio na’i imoido nou aibo tau imowaetairo, nouri nou himia Morio Mere, Iehovaro batibatito tau otiodoiro, ina nouri imo kiiro noudo niviaumo.

Ina dubu nou naiba arowa: Mo Iehovaido niro nimahebidio wia nou namu oriha eauriwa, nouvia koromohuwo duburi, mabu nouri ina dubu naiba nou himia namu nouro tau eauri nou niro emahebidio biahai, Iehovaido teiri remahebidio nou niro, ina nouro nou eauri biahai.

Dubu amidao nou aiobodoumo Iesu nou Iehova Mereri; Iehova nou turiwa remidiodio wia nou Iehovamuri.

Wia nouri wade modobo imoo nou mabudo noweaumo: Dubu nou Iehovaido niro emahebidiowa, nou himia namuido nouvia niroiha emahebidioi nou aibo.

Nanaio, urio auwohaido irovidioumo aue. Urio’i taimahebaimo noupa nei Iehova uriori; mabu nouri kiromohuwodio peroveta oubi godogodo nei batibatiwa tau orohotutiumo. Nouri rio umo aiwai‐moiti Iehova urio’i. Urio auwoha nei naibaha obodoimo, Iesu Keriso nou goho ramu tau o’uro, nouvia Iehova uriori.

Ina urio auwoha nei obodoimo biahai Iesu goho ramu tau o’uro neivia Iehova urio biahai, wia urio nouri nou Keriso komobori uriori. Rio tau orovidioumo nou aiwauro’ui wia doihabuo nou batibatiwa naibaha remidio.