Popular Bible Verses from Juan 10

Share

Ja̧danö, naukwabo̧ma sulabenö ja̧oböda icho̧, o̧bȩja̧dönö önaukwoböbi, kwabö looböbi, jwiinö söbebö looböbi. Jo̧kwaijayonö ötjöma naukwabo̧ sulabenö ja̧oböda ichi̧danöma chichinokobe böjȩnö ju̧kwadö jojodönöma. Jojodö ba̧kwȩlö̧jatebö tjö̧ji̧ chiyobö chichijatö. Ja̧danö, jojodö jwiinö otiwanö tjuju̧kwobö chichijatö ötjöma— yöawinobe Jesúsma.

Ina yöawinobe: —Ötjödasa, o̧bȩja̧dönö otiwanö te'ada̧lo̧ma. Ja̧danö chöpöjojodö tjichitjö̧bi kabatibö̧kö̧sa chite'ada̧lawö̧nöma, chöpöjojodö ötjönö kwabö lotjenatjö̧bi. Te'ada̧lo̧sa, kwabö lotjenatjö̧bi.

Ötjö cha̧jwi̧muma ötjö chiwene a̧ja̧kwö waisadö, ja̧danö, jobadönö chöwaisawö̧. Ja̧danö, jobadöma chökömanö ichadö.

Jobadönö ba̧kwȩlö̧jatebö ja̧kwawa chiyawö̧. Ja̧danö, tjö'wöchökakwedö, ötjö ba̧kwȩlö̧jatebö ja̧kwawa chiyawö̧ma. Ja̧danö, otiwanö chite'ada̧lobetjö̧ bakwo̧bi deobe jobadönö ötjötjö 'döbebö emibo̧ma.

Ötjödasa apjudedanö jo̧ma. Ja̧danö, ötjönö tebachadönöma tjö̧jibinö pjabato̧sa. Ja̧danö, ötjönö tebachadöma ötjö chite'ada̧lawö̧ o̧bȩja̧dödanöbedö. Ja̧danö, chite'ada̧lawö̧ o̧bȩja̧dödanöbedöma ötjönö tebachöbi tebachadö, labeböbi labebadö. Ja̧danö, ötjö apjudedanö jo̧nö labebajadö meje'ye kwanö otiwanö ja̧dödanö otiwanö ja̧dö— wanedö yöawinobe Jesúsma—.

Ja̧danö, ötjöma, jejenömabö̧kö̧sa. Otiwanö te'ada̧lo̧sa. Ötjö cha̧jwi̧munöma chöwaisawö̧. Ja̧danö, cha̧jwi̧muma ötjönö waisadö.

Ötjö Chabe'do iyijatö jobadönö ötjönöma. Jo̧bama böjȩnö ju̧kwadötjöbi, mölejȩbe ju̧kwadötjöbi o̧penönö juluwo̧. Jo̧kwaobetjö̧ bakwo̧bi deobe jobadönö Chabe'dotjö 'döbebö emibo̧ma. Ja̧danö, ötjö, ötjö Chabe'do bakwo̧dabedösa— yöbawijetö Jesúsma.

Jejenö ötjökwö, Chabe'dokwö jo̧be. Ötjö Chabe'doma ötjönö öwaisobe, ja̧danö, ötjöma Chabe'donö chöwaisobe. Ja̧danö, ötjöma cha̧jwi̧mu o̧bȩja̧dö tjö̧jibinö ö'wöchö midawö lotakwo̧sa.

Ötjö chö'wöchi̧ma, bakwo̧bi deobe, chö'wöchinö baibanö ja̧bo̧ma. Ötjödasa ö'wöchö midawö lotakwo̧sa. Ötjödasa juluwo̧ma, ö'wöchö midawö lotobö. Ja̧danö, ötjödasa, yadakwödanö tjetachajinö juluwo̧ma. Jejenö batibobö Chabe'do weinökwesa— yöawinobe Jesúsma.

Jo̧kwaobetjö̧ Jesúsma yemidanö wanedö yöawinobe jobadönöma: —Isabenö yötawa. Ötjödasa o̧bȩja̧dö tjabȩko̧ apjudema. Ja̧danö, ötjönöda tetjachobö jo̧be—yöawinobe—.

Jelo̧ o̧bȩja̧dönö ite'ada̧lobö midö weökwema ösödö omukwatinokobe o̧bȩja̧dönöma, jo̧ba a̧jwi̧muböködötjobetjö̧. Jo̧bama otiwanö ite'ada̧lokobe o̧bȩja̧dönöma. Ja̧danö, jo̧bama tebo awili ichobe ediakwawö döbibajo̧, o̧bȩja̧dönö le'dedibö. Ikenama, jo̧ba döibaja okobetjö tebo awilima o̧bȩja̧dö tjö̧jobekwö ichö jobadötjö ju'wedönö yöbö kwo̧. Ja̧danö, ju'wedöma omönanö 'wobekwajadö.

Jesúsma wanedö yöawinobe jojodönöma: —O̧bȩja̧dönö te'ada̧lo̧ma o̧bȩja̧dö tjabȩko̧ apjudenö tebacho̧, o̧bȩja̧dönö a̧petube öibobö—jö̧a̧linobe—. Jo̧kwaijayonö jelo̧, apjudenö tebachökönö, mönö nöchö tebacho̧ma o̧bȩja̧dönö naukwabo̧. Isabenö yötawa, jo̧bama naukwabikwawa jojo, o̧bȩja̧dönö te'ada̧lo̧bö̧kö̧. Ja̧danö, o̧bȩja̧dönö te'ada̧lo̧ma apjudenöda tebacho̧.