Popular Bible Verses from Márcos 14

Share

Mu jé jno dacatecãraitigade údi ga chojninga: –Yapa yajnengóri á, que cucha ibiratique cus ome ua gotique. Be ga aqueta yu iji yajnei pujuyaqueque gajneri uje gajnui tu cucha otate unerótique ome yu. Mu que yajéode u go ujetiga yi yáyipiedie quitígo. Mu jé be báyipiedie quitígo ome yu.

Beyoi ga ayáyoji de mu ãrijínaño uaquejode ga acatecãchoi Dupade. Jé socaseti ca Satanás chijnime uacãrírique jne ome doitígo petingaquéo. Jé ũrepise yu uje yirajapise uje uacáyipiedie dimanepise ome cucha omone yui, mu jé basa uacáringai ayoré uté u uje que ujñapeque go ome udore yui.

Jé ũrepise yu ome yuruode udojo quigode: ujetiga diga ore jno yujnomei údi ome erámi údode jnese ujetiga ore chimate erámi unirisórone aja ore úringáringo piquetacho, mu a jé jogadi tupo jne rĩ ujetiga ore chatata chequé uaté úringáraque ibijogue ome dacaniratiguéode udojo ome yu. Ga a ore jnusinamané uaté gatuaque to jne.

Jé u uje chojningame dajorane udore ore: –Yáyuguhebátigade udojo nápisa yu aja jnumi. Mu gajnui tupúsu ujetiga e chimate yu aja jnumi. Mu beyoi ga ácayoji de mu ãrijínaño uaquejode gajneri.

Mu uje jé ore déji dáringáringo chagúo gai ga jé jogadi u uje Jesús chisa arurégode iji gaté iji dajmainie. Mu qué chacãre Dupade gai bajaque. Ga jé u uje chajuguína dacadigode ore iji ga chósi tome ore: –De do jã. Acho udojo mu imoi tu yaoi dirome.

Iji quigade ga jé isocai tu ome ore jopidéraque uje chisaji gaté to. Ga chacãre Dupade gai bajaque. Ga chisi ome dacadigode ga ore chóji iji ore jopidé uaté jnese. Mu chojningame ore: –Cucha otadi udé imoi tu yiyoi jne. Uje a yojne ome yiyoi jne ujetiga ayorébujnaringo ore cho dagutíyamáni iji yiyoi jne. Enga ujetiga yitoi enga yojne ome yiyoi ga jogadi tu jne ujetiga Dupade áyipie ichadie quene chuságaja dáringáringui ujñapetei.

Uje ore déji cucarani uté enga Jesús chojningame dacadigode ore: –Idógosipise ujetiga oyópise uacáyugu uágome yu iji dejai tudé jne enga cho ujetiga uacanguretigade udore ome yu bijna ome uaque jnese. Uje ore urusarane Dupade urúo déji gu uje quigode chósi te: "A yujérase áyasadie irodisṍri jne enga a jé u gajneri ujetiga uté gachidedie ore chisite rágaja erámi údode jnese."

Jĩrique ãrijíño ga yico. Chamáñaje yajmasṍri e di.

Mu Jesús chojningame Pédro: –Jé ũrepise yuruode udojo ome ua. Uje dejai a jé u udé jne ujetiga cáma cochagájnarique po ga gare, mu a jé jogadi u jne ujetiga otigase báringai yacadique ga gadioque to jne iji ayorébuode ujade.