Popular Bible Verses from MATIUS 6

Share

Jadi pekoumo ruru ri ja'i Alatala pade tunggai mowia dotana pade pura-pura etu kana rapakagana ka komi.

Sabana etu ne'e makini-kini mompekiri bara nuapa majadi naile, sabana naile naria mboto kasusana. Kasusana eo e'i naganamo rapekirita eo e'i.”

“Sabana etu kuuli ka komi, ne'e makini-kini rara mompekiri katuwu komi, bara nuapa rakoni komi atau rainu komi. Ne'e makini-kini mompekiri koro komi mboto bara pakea nuapa rapake komi. Sabana to napokona riara nggatuwuta da'a aga panggoni bo pakea.

Tapi ane komi mosambaya, pesuamo riara ntombimu pade pikumo pewobo. Posambayamo ka Umamu to da'a nikita. Pade Umamu to nanggita komi nosambaya nggalino kana mombabalasi komi.

Jadi posambayamo komi iwe'i: ‘Uma kami to naria riara suruga, rabila kami sangamu. Karatamo Komi moparenta ri dunia e'i, kajadimo dotamu ri dunia nasimbayu ewa ri suruga.

Waimo ka kami panggoni butu-butu eona.

Pade ampungimo silaka kami ewa kami wo'u nombaampungi tau-tau nowia sala ri ja'i kami.

Ne'e rapakamba kami rapesoba, tapi kabasakamo kami nggari kuasa Magau nu Seta. [Sabana Komimo Magau to nabaraka bo nakuasa sampe ri kasae-saena. Amin!’]

Ane komi mombaampungi tau-tau to nompowia sala ri ja'imu, Umamu ri suruga wo'u kana mombaampungi silaka komi.

Kitamo tonji-tonji ri laerawa! Ira da'a notuja pae, da'a nokato bara nomboli pae riara logo. Tapi naupa iwetu Uma komi ri suruga nombawai ka ira panggoni. Pade riara mpanggita Alatala katuwu komi neliupa nggari tonji-tonji.

“Ne'e komi mompasiromu kakalumana ka koromu mboto ri dunia e'i. Sabana kakalumanamu ri dunia namala rakoni saipa bara tagara, pade peto'o pomboli kakalumanamu mamala ragero bo kakalumanamu etu rapangangga ntau. Agina komi mompasiromu kakalumana ka koromu mboto ri suruga. Sabana ri setu kakalumanamu da'a namala rakoni saipa bara tagara, pade peto'o pomboli kakalumanamu da'a namala ragero bo rapangangga ntau. Jadi ne'e mompasiromu kakalumana ri dunia, sabana ri umba kakalumanamu ri setu wo'u pekirimu.

Da'a ria samba'a tau mamala majadi batua nggari romba'a madika. Sabana i'a kana magigi rarana ri ja'i madika to samba'ana pade mompotowe madika ntanina etu. Bara i'a kana mombabila madika to samba'ana pade momporau rara madika ntanina etu. Iwetu wo'u ane komi. Da'a mamala komi mepue sanggani ka Alatala bo manjarumaka mbara-mbara ri dunia e'i.”

Ane Alatala mompakaramba bunga-bunga ranggawoko to natuwu sampalai lau pade nipalabu riara apu, natantumo I'a kana mombawai ka komi pakea to niparaluu komi. Komi mpu'u-mpu'u tau to nakura pomparasaya!

Tapi ane komi mombawai doi petulungi ka tau-tau nakasiasi waimo nggalino. Ne'e rapopanjani ka tau ntanina. Pade Umamu ri suruga to nanggita powiamu nggalino etu kana mombabalasi kabelomu etu.”

“Toramo, ne'e komi mompowia ada-ada to nipakatantu riara Atura-atura agama ri ngayo ntau dea ala rakita ira. Sabana ane iwetu pokainggu komi, powiamu etu da'a ntoto rabalasi Umamu ri suruga.

“Ane komi mapuasa ne'e mompopokita lenje ewa tau nandasa ewa kabiasa ntau tumoni-moni nabelo. Ira tunggai nombabali lenje ira ala manoto ka tau ntanina ira napuasa. Aku mpu'u-mpu'u notesa ka komi, nirata iramo pura-pura balasi nggari powia ira etu. Tapi ane komi mapuasa, pendo'umo bo salagamo wo'omu ala ne'e ranjani tau ntanina komi mapuasa, aga ranjani Umamu ri suruga to da'a nikita. I'amo to manggita powiamu nggalino etu pade mombabalasi komi.”