Popular Bible Verses from Ore i mexü̃ ga Cuáü̃ ümatüxü̃ 14

Share

Rü ñu̱xma nax pexna íchixũxü̃, rü pexna chanaxã i taãxẽ. Natürü ngẽma taãxẽ i pexna chaxãxü̃, rü tama ñoma i naanecüã̱x pexna ãxü̃ i taãẽrüxü̃ nixĩ. Rü tama chanaxwa̱xe i penaxĩ̱xãchiãẽgü rü pemuü̃e.

Rü Ngechuchu nanangãxü̃, rü ñanagürü: —Choma nixĩ i nama i Chaunatüxü̃tawa nadaxü̃. Rü ngẽma nüxü̃ chixuxü̃ rü aixcüma nixĩ. Rü choma nixĩ i duü̃xü̃güxü̃ chamaxẽxẽẽxü̃. Rü chaugaguxicatama nixĩ i Chaunatüxü̃tawa nangugüxü̃ i duü̃xü̃gü.

Rü Ngechuchu rü ñanagürü: —¡Taxṹ i penaxĩ̱xãchiãẽgüxü̃ i pemax! ¡Tupanaaxü̃́ peyaxõgü rü choxü̃́ rü ta peyaxõgü!

Natürü Chaunatü rü tá chauégagu núma nanamu i Naãxẽ ya Üünexü̃ nax pexü̃ nangü̃xẽẽxü̃ca̱x. Rü nüma i Naãxẽ ya Üünexü̃ tá pexü̃ nangúexẽxẽ i guxü̃ma, rü tá nüxna pexü̃ nacua̱xãchixẽxẽ i guxü̃ma i ore ga pemaxã nüxü̃ chixuxü̃.

Yíxema texé ya nüxü̃ cuáxe rü naga ĩnüxe i chorü mugü, rü tanango̱xẽxẽ nax aixcüma choxü̃ tangechaü̃xü̃. Rü Chaunatü tá tüxü̃ nangechaü̃ ya yíxema choxü̃ ngechaü̃xe, rü choma rü tá ta tüxü̃ changechaü̃. Rü chaugü tá tüxü̃ chawe̱x —ñanagürü ga Ngechuchu.

Rü choma tá Chaunatüna naxca̱x chaca nax núma pexca̱x namuaxü̃ca̱x i to i perü ngü̃xẽẽruxü̃ i Naãxẽ ya Üünexü̃, nax guxü̃gutáma petanüwa nangẽxmaxü̃ca̱x. Rü nüma i Naãxẽ ya Üünexü̃ tá nixĩ i pexca̱x nango̱xẽẽãxü̃ i ore i aixcüma ixĩxü̃. Rü ñoma i naanecüã̱x i duü̃xü̃gü rü taxucürüwama nanayauxgü, erü tama nüxü̃ nadaugü rü tama nüxü̃ nacua̱xgü. Natürü i pema rü marü nüxü̃ pecua̱x, erü nüma rü petanüwa nangẽxma. Rü guxü̃gutáma pewa nangẽxma.

Rü guxü̃ma i ta̱xacü i chauégagu Tupanaxü̃tawa naxca̱x ípecaxü̃ rü tá pexna chanaxã. Rü ngẽmaãcü tá chanaxü nax chaugagu nangóxü̃ca̱x i Chaunatüarü pora. Rü choma tá chanaxü i guxü̃ma i ta̱xacü i chauégagu choxna naxca̱x pecaxü̃.

Rü ngẽxguma aixcüma choxü̃ pengechaü̃gu, rü naga tá pexĩnüe i chorü mugü.

Chaunatüpatawa nangẽxma i muxũchixü̃ma i ucapugü. Ngẽxguma chi nataxuxguma, rü taxũchima pemaxã nüxü̃ chixu. Rü ngéma tá chaxũ nax pexca̱x chayamexẽẽxü̃ i pechicagü.

Rü ngẽxguma ngéma chaxũxgu rü choxü̃́ namexgu i wüxi i pechica, rü wena táxarü núma chaxũ. Rü pexü̃ tá chayagagü nax ngẽma íchangexmaxü̃wa pengẽxmagüxü̃ca̱x.

Rü Tumáchi rü ñanagürü: —Pa Corix, tama nüxü̃ tacua̱x nax ngextá cuxũxü̃. ¿Rü ñuxãcü tá i nüxü̃ tacuáxü̃ i ngẽma nama? —ñanagürü.