Popular Bible Verses from LUKAS 3

Share

Suapang kaul᷊i u taumata e'e nisahani, I Yesus l᷊ai nisahani. Dang su tempo I Sie kapukal᷊iomanenge, l᷊angi nawuka, dang Roh u Mawu Ruata natuntung si Sie kere Paluma. Bou e'e nikaringihi tingihu Mawu Ruata nangul᷊i, “I Kau Ahusi-Ku ko i kukindaghi. I Kau makal᷊uasi naung-Ku.”

E'e sabapie i Yohanes nangul᷊i si sire kaul᷊ie, “Ia manahani si kumu dingang u ake, arawe hindo sarung sumongo taumata ko lebe l᷊abo bou ia. Mamuka tal᷊ingu sapatu-E, ia tahinonge. I Sie sarung manahani si kumu dingang u Roh u Mawu Ruata l᷊au u putung.

Tul᷊ara dingang u kakanoa u ko i kumu seng nutobati bou apang dosa ngi kumu! Kumbahang mu sau muhabaru i Abraham i upung i kumu. Putinaung: bou mang watu i'i Mawu Ruata botonge l᷊ai mukoa hintou ngi Abraham!

Wal᷊iung seng na sadia guna ngu manuwang kau sarang hamue. Apang kau ko tamu wua ngu wua ko mapia sarung i tuwang dang i rume su l᷊al᷊ung u putung.”

E'e musul᷊ungu kawawohe su l᷊al᷊ung u buki i Nabi Yesaya: “Pia taumata kakiha e su tana l᷊inggi, ‘Sadiai ko l᷊al᷊eng guna ngu Mawu, Pakateneko l᷊al᷊eng guna-Ngi Sie. Apang kuwae ambunge, apang wul᷊ure l᷊au bongkonge ipakatene Ral᷊eng ko bengko mambeng pakatul᷊iri, dang l᷊al᷊eng ko napeneu l᷊ohange mambeng pakatene. Apang taumata su kaul᷊i u dunia sarung mutuhung Mawu Ruata mananal᷊amati taumata!’ ”