Popular Bible Verses from LUKAT 6

Share

Ugun wogorogwe kiinok, ugun wokkirogwe kaamunggup o. Togolowa'na eno korok togon yonggoppunuk, nggwik-nggwik eeke, tebenogo wuppege, eeppunuk, a'nggan ngginu-ngginu wangge kagak, kinabu'me ngginggirogo mengga kwak, ndak-ndak wokkirage kaamunggup o. Wakkagak nogo paga wakkaanuk aakumi wogorogo monggotak nogo ti, ndak-ndak wakkaanuk wokkirage kaamunggup o,” yoragagerak.

Aap abe mendek inikime yugu abe mendek nogo paga obeelom mban eeke menggerak. Ndi, aap maluk mendek inikime yugu maluk mendek nogo paga maluk mban eeke menggerak. Inikime uum kilu-kilu wungge logonet, ambe paga nen ari menggerak o,” yoragagerak.

Kit perak, at tiyanak lombok menggerak nen it aap maluk mendek iniki lambek-nggoonak menggaarak nogo iniki kunik aganake menggerak me, kit nen it kinom ogoorak monggotak kiniki kunik eeginako logonet, obeelom eeppiigwi, Peebi wo'niraagun, mbaka'lek logonet, ugun wogorogwe, eekwi kiinok, kit an napuri aret o, yinuk, kinake pugu iya tit wokkirage kaamunggup o.

Kinogoba nen aakumi inabuwa mbake logonet, obeelom eeppiige minggi kwak, kit ndak-ndak inabuwa mbako logonet, obeelom eeppiigo logonip o,” yinuk, yoragagerak.

Yorage nagagirik, ”Kit nen kinoone omaawi paga perak togon aakumi yorage logonet, Kit maluk o, yinuk, yoraagup o. Kinoone omaawi paga perak togon yorogwe lek kiinok, Ala nen perak togon, Kit maluk o, yinuk, yokkiraagin lek o. Kit nen aakumi inenggali wappiyaagup o. Inenggali wappiiga'lek kiinok, Ala nen kit kinenggali wappinagagin lek o. Kit nen it aakumi maluk eeppinagagwi nogo mi eerogo pogo logonip o. Mi eerogo pugwi kiinok, Ala nen kit kinomaluk lek eerogo pinagagin o.

Yorage nagagirik, at Yetut nen, ”Kit an noone konenggwi yi, wone ambi yokkira o. It kinom ogoorak monggotak ti, kiniki kunik eeginakwi, ineebi kinombakwi nogo obeelom eeppiigwi, it inanini nen kugi pulunogo pinagagwi nogo kiniki ale'nggen inoba piigwi, it maluk eeppinagago menggaarak nogo inake tamban eekwi, eeko logonip o.

Aakumi nen, Ndogop eeppinaniyak ao, mbako monggotak nogo ndak-ndak eeppiigo logonip o.

Ndi, kinagandin peenok paga kinookwi iinok, peenok aret wogorogwe, kinayum togwi yum waganggwi iinok, kinayum agi yirika ili yugup o. Ata, inom aret wogorogwe, nggino yokkirogwe iinok, aret wogorogwe, eeko logonip o. Kinamendek waganggwi iinok, Wo'ninip o, yoroorak ti mage o.

”Eyo obeelom nen anggen maluk mendek yegeelik o. Ndi, eyo maluk nen anggen obeelom mendek yegeelik mban.

Yi eyo ndi eyo eebe anggen yege paga ineenu ogo menggaarak. Kit eyo ara anggen nogo eyo poondo alokwi paga yugume waganggulik o. Ndi, anggur anggen nogo keele tagana'le paga yugume waganggulik mban.