Popular Bible Verses from YOHANI 15

Share

“Ine ndine mtawi wamfesa, imwe ndimwe nthambi zache. Munthu anakhala muna ine, inembo muna iye, anabala nsapo zizinji; thangwi kusowa ine, imwe nkhabe kwanisa chita pinthu tayu.

Khalani muna ine, inembo ndinakhala muna imwe. Nthambi pa yokha ene nkhabe bala nsapo ingakhonda khala pamuti, sasawambo na imwe nkhabe bala nsapo mungakhonda khala muna ine.

Mungakhala muna ine, pontho mafalanga angakhala muna imwe, mupemphe chonsene chinafuna imwecho, tenepo munachipaswa.

Si imwe mudandisankhula tayu, mbwenye ndine ndidakusankhulani mbandikupambulani kuti mukabale nsapo zizinji, nsapo zile zinakwanisa kupirira. Tenepo Baba anakupasani chinthu chonsene chinampempha imwe na dzinanga.

Nkhabe munthu kumfuna mwanzache kupiringana penepa pakuti munthu ataye moyo wache thangwi ya ashamwali ache.

Iye ambagwanda nthambi zonsene zokhonda bala nsapo muna ine, pontho iye ambasadzulira nthambi zonsene zakubala, towera mutiwo uchene, pontho kuti nthambi zibale nsapo zizinji.

Matongero anga mbawa: Funanani unango na mwanzache, ninga montho mumbakufunirani ine.

Demelero ya Babanga ikuoneswa na kubala kwanu nsapo zizinji, pontho pakukhala anyakufunzanga.

“Ine ndine mtawi wamfesa chadi-chadi, pontho Babanga ndi nyakulima.

Munthu anakhonda khala muna ineyo ambakhala ninga nthambi yakutayiwa mbiuma; nthambi ninga zenezi zimbagumanywa mbiziponywa pamoto mbizipiswa.

“Ine ndakupangani penepi kuti kukomerwa kwanga kukhale namwe, pontho kuti kukomerwa kwanu kukhale kwakumalisikiratu.

Mungavera matongero angawa, imwe munakhala mu kukufunani kwanga ninga montho mudavera ine matongero a Babanga mbandikhala mu kundifuna kwache.

Tenepo ndinakupasani matongero awa; funanani unango na mwanzache.

Imwe mbamudakhala abodzi na anthu a padziko yapansi, iwo mbadakufunani thangwi ndimwe anzawo. Mbwenye ambakuzondani thangwi ndakusankhulani pakati pa anthu a padziko yapansi, tenepo si imweve anzawo tayu.