Popular Bible Verses from Yohanes 17

Share

Wali Pa’angKu, pake tuntuMu mangampotundeka sira apa tuntuMu etu, etu semo anu to monso. Wali ane sira rapotundeka anu to monso etu, sira damawali tau to rani mampolaika songka ngKomi.

Wali batuanginya katuwu to singkasaenya, batuanginya etu semo tau maya mangansani Komi. Apa Komi semo i Pue Allah to monso pasi to samba’aja. Pasi katuwu to singkasaenya etu, batuanginya seja sira maya mangansani i sema kamonsonya Aku. Apa Aku semo i Yesu Kerisitu, to nupokau ngKomi.

Wali i Yesu mampakapolas pokai-kaiNya, Ia manganto’o wo’u, “Wali si’a ojo anagurungKu etu to Aku mampokaika. Aku mampokaika seja samparia tau to damangaya Aku ri tempo to darata saba yako kareba to nakeni nu anagurungKu etu. Aku makai-kai resi Komi, Pa’a, see tau to damangaya etu, sira samparia damawali samba’a pampobuuka nsira sewaju ewa Kita. Apa Komi samba’a pei Aku, pasi Aku samba’a pei Komi. Wali Aku makai-kai see sira mawali samba’a pampobuuka pei Kita. Etu semo pokai-kaingKu, apa ane sira samba’a pampobuuka pei Kita, to lino to taa mangaya, sira damangansani monso pu’u Komi semo to nampokau Aku.

Wali Aku makai-kai resi Komi si’a marapi see Komi damangkeni yau sira yako ri lino si’i. Aku ojo marapi see Komi damangararamaka sira naka ne’e sira dananangi i maja’a, etu semo i Kepala nto pantipu.

“Wali tau to mangaya Aku, Aku mampakabae sira sewaju ewa naika ngKomi mampakabae Aku. Naka pei Aku mampakabae sira, see sira dasamba’a pampobuuka sewaju ewa Kita samba’a pampobuuka. Batuanginya mawali samba’a pampobuuka, etu semo, Aku maroo ri raya nsira, pasi Komi maroo ri rayangKu, wali ane ewa see, sira maya samba’a kojo pampobuuka nsira. Pasi ane sira samba’a pampobuuka, ane ewa see, to lino to taa mangaya damangkita kasingkatao nsira etu panewa tau to taa mangaya etu damangansani Komi semo to nampokau Aku. Pasi sira damangansani Komi mamporayang tau to mangaya Aku, pasi pamporayang ngKomi resi tau to mangaya etu sewaju ewa pamporayang ngKomi resi Aku.