Popular Bible Verses from Éxodo 12

Share

Näy jä'ä tsu'umës ëjts njëtita'any jap Egiptë winjëën wintëjk etsës nyaj'o'kta'aja'any tëkokyë yë kä'äxkopktëjk maajaty yë jëën tëjkën. Näyjyëtu'unës nyaj'o'kta'aja'any tëkokyë yë jëyujkëty yë kyä'äxkopkëty etsës ntëytyuuntaja'any tëkokyë mëti'ipë tios'ajtëpën Egiptë. Ëjts, mëti'ipë Wintsën'ajtpën, ëjts ënaanp. Yë ne'pny yë'ë nëjkx yë mjëën mtëjkëty xytyukkoytyë, yë'ëtsës n'ixëp etsës jëtu'un nijawëty ko ënety miitsëty jap myajpaatë. Paaty koos ënety naxy ma ja Egiptë ja'ayëty ja jyëën tyëjkëtyën, maas ënety nyaj'ooka'anyën tëkokyë ja kä'äxkopktëjk. Ma miitsëtyën nitu'uk pën kya'ookëty, jä'ä ko ja ne'pny jä'äs n'ixëp etsës jëkäm naye'eyëty ja mjëën mtëjkëty.

Ya'atë xëëw yë'ë tu'uk mëj'äämpy itëp, mëti'ipë ja Dios jä'ä yajtukmëjjawëpën ets xëmë jëtu'un nëjkx ja'amyetsy xyaj'itë. Ya'atë xëëw jëtu'un xyaj'itëty tä tu'uk yë ënä'ämënën mëti'ipë xëmë ijtëwëpën. Jä'ä ko yë m'u'unk m'ëna'këty kopkpëky ko nëjkx näjyëtu'un tja'amyätstë.

E ko ënety ja m'u'unk m'ëna'këty jëna'a myajtëwëtë: ¿Tiitën mnixëëwtuuntëp? Tääts nëjkx xy'ëtsowtë: Ya'atë jëyujk yë'ë tu'uk yë wintsë'kën mëti'ipë yajtukmëjja'awëpën yë ëmaayxyëëw ma ja Dios yajmëjjawën. Mëët ko tëkokyë tyaj'o'ktaay ja kä'äxkopktëjk jap Egiptë ets ko ja Israel ja'ayëty jëkäm ja jyëën tyëjkëty yajnanajxtë ma ënety jap tsyëënëtën Egiptë ets jëtu'un'äämpy ojts tyajtso'oky ja nja'ayajtëmë. Ënet ja Israel ja'ayëty wyintak nyaaxkoowtë ets ja Wintsën tmëjja'aw tjaantyjya'awëtyë.