Popular Bible Verses from Matayi 24

Share

Ilelo she nuvwilanyankomelezyo vuliyonjelezelwa, pʼishenʼishikunzi sha vinji shililotela. Nkandʼuno wengʼakwumishizya ukufiha pampelela wʼalipona.

Inongwʼinyinza zya vumwene zinizi zilikumuha mwonti munsʼumu mwe vasamiyʼavantu, vontʼavakunzi vazimanye, ilelo pʼuvusililishilo vuliyinza.

Muliyiṿwa nuvulugu ninkolo zya vulugu. Mwandaje, mutatetemaje; she zye pakuti zitalihaje zinizi, izyene nyene izya kuvusililishilo pe zishili suti.

Shʼuluho lwoka lwa vantu lulihalambihʼuluho lwamwavo, nuvumwene vwoka nuvumwene vwamwavo. Yiligwa ninzala, ninsi yiliyinga munsi munsi. Zyonti zinizi nyene vwe vwando vwa kuvavwa imbuza.

Niya kumwanya niya pansʼinsi zye ziliyepa, nkandʼamazwi gane nyene ge gataliyepa nalumo.

She valiyinza mwizina lyane ve vinjʼavantu, ve valitinji: Nene ne Chilisiti. Valivapuṿwa ve vinjʼavantu.

Pe valivambilila kuva kuvizizya valivagogʼimwe. Muliva mwe vapatwa kuvantu vonti she muli nizina lyanʼine. Pe zilivapunuzya ve vinji zinizi, nave valilonjelana nave valipatana vuvo vatupu. Vope navakuvwi avilenga ve vinji valiloleha, avene valivapuṿwa ve vinjʼavantu.

PʼuYesu ahamula ahati: Mwandaje, mwenyaje numʼatavatezyaje.

Mwe mumwo muyisenganyaje vovulo namwe, shʼuMwanamuntu aliyinza pahavalilizyo huho hʼimwe mulitinji ingavangʼashili.

Mwe mumwo mudamule, she mutamanyilʼahavalilizyo aha kwinzilʼuMwene winyu.

Ilyenʼisiku lila nyene ahavalilizyo huho numʼumuntu atahamanyile, nga ve vahavizya va kumwanya nga Mwana, weka we Tata wʼahamanyile.

She pe valilolehaga avachilisiti avashifumbo navakuvwi vashifumbo, valipelaga namamfindango namayele aga kulingʼukuvapuṿwa nave vasavulwa.

Izya pavwinzilo vwa Mwanamuntu Zyope ziliva she shila inza shʼizya pamwaha wa Nwaka. Pala mumanda gala, lwʼamahava gamakwinza, pʼavenʼavantu shima vali nukulyʼiṿintu nukungʼwelʼipele nukusendʼavantanda, nukusendwa kuvanaṿuli, vahavalʼukufiha pisiku lilyo lyʼuNwaka ayinjiye mumbogoso. Vatamanyinsinye nazimo, vahavalʼukufiha pupo pe vagandusilʼamahava ginzilʼukuvasompola vonti. She valihonzya vovulo pope napavwinzilo vwa Mwanamuntu.