Popular Bible Verses from ƆRƆMUKAW 1

Share

Ne tɛ maloya ka kibaru diman fɔ, bari Ala ka sebagaya koo lo, mɔgɔ minw bɛ la a la, kisili ye olu ta ye, k'a daminɛ Zuwifu ma fɔlɔ, o kɔ siya wɛrɛw.

Kibaru diman le b'a yira ko Ala bɛ mɔgɔ jati mɔgɔtilennin ye a jigi kɔsɔn, a bɛ to o tilenninya la jigi barika la, i n'a fɔ a fɔra cogo min na Ala ka kuma na ko: “Mɔgɔ min y'a jigi la Ala kan, Ala ka sɔrɔ k'a jati mɔgɔtilennin ye, o tigi bɛna kisi.”

Tinyɛ na, k'a ta dinyɛ dantuma na, adamadenw bɛ Ala ka koo yebaliw ye ka gwɛ a ka baara fɛ, o min ye a ka sebagaya banbali n'a ka Alaya ye. O la, tinyɛ sɔrɔsira t'u fɛ tugu.

Bari u ye Ala lɔn, nga u ma sɔn k'a bato i n'a fɔ Ala, ani u ma sɔn ka barika la a ye a cogo la, u filila u ka miiriya la ani ka kɛ nalomanw ye ka tunu dibi la.

U ye Ala ka tinyɛ to yen, ka tugu galon kɔ, ka danfɛnw le bato ka baara kɛ u ye, u ma Danbaga bato, ale min ka kan ka bonya tuma bɛɛ. Amiina.

O le kɔsɔn ka Ala to sankolo la, a bɛ dimi mɔgɔw fɛ minw tɛ siran a nya, n'u bɛ tilenbaliyako kɛ ka tinyɛ dogo.

O le y'a to, Ala y'u to yen nigɛjuguw la o min ye malobaliyako ye. U ka musow tɛ cɛko kɛ n'a nyaa ye tugu. Olu yɛrɛ bɛ la ni nyɔgɔn ye. O cogo la, cɛɛw tɛ musow nyini tugu fɔɔ u b'u cɛnyɔgɔnw kɛ i n'a fɔ musow. O le ka di u ye. O la, u b'o sara sɔrɔ u yɛrɛ ma, o min bɛnnin bɛ u ka kɛta ma. U ma sɔn ka Ala lɔn minkɛ, o la Ala fana y'u to u ka miiriyajugu la, o cogo la, u man kan ka koo minw kɛ, u b'o le kɛ.

U b'u yɛrɛ jati kolɔnbagaw ye nga u ye nalomanw ye. U ma Nɔɔrɔtigi Ala yɛrɛ bato fɔɔ adamaden jaa ni kɔnɔw ni sennaanifɛnw ni fɛɛn minw bɛ fofo duguma, u bɛ olu le bato.