Popular Bible Verses from Juan 14

Share

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Hesu he’i ichupe: Che ningo pe tape, pe añetegua ha pe tekovete, avave ndaikatúi og̃uahẽ che Ruete rendápe cherehe’ỹ. Cherupímante uvei ikatu oñeg̃uahẽ Ñanderuete rendápe.

Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

Pe Pytyvõhára, pe Pytu Porãmbáva, Ñanderuete omboútava pene rendápe che rérape, Ha’e penembo’éta opaite mba’e, ha penemomandu’áta opaite umi mba’e Che ha’emava’ekue peẽme.

Upe oikuaáva che rembipota ha ojapóva avei, upéva ningo cherayhu añetehápe, ha upe cherayhúva, Ñanderuete ohayhuva’erã avei ichupe. Ha Che ahayhúvape ahechaukáta avei che mborayhu.

Ha Che ajeruréta che Ruetépe, Ha’e ombou hag̃ua ambue Pytyvõhára (Pytu Porãmbáva) pene rendápe, Ha’e opyta hag̃ua tapia g̃uarã penendive. Pe Pytu Añeteguáva, ko múndo ndaikatúi orecibi, ha’ekuéra ndohecháigui ni ndoikuaáigui ichupe. Peẽ katu peikuaa ichupe, Ha’e opytátagui penendive ha oikova’erã pendepype.

Ha opaite mba’e peẽ pejeruréva che rérape, upéva Che ajapóta avei. Che Ruete oñembotuicha hag̃ua chérupi. Peẽ pejerure ramo che rérape, Che ajapova’erã.

Peẽ cherayhu ramo, pejapóta avei che rembipota.

Che Ruete rekohápe oĩ heta óga, upeicha’ỹ rire ha’eva’erãmo’ã peẽme, ko’ág̃a katu aháta ambosako’i hag̃ua pene rogarã.

Ha Che aha rire ha ambosako’ipa rire avei, aju jevýta pene rendápe pogueraha hag̃ua chendive, peẽ peiko hag̃ua avei che aikohápe.

Upérõ Tomas he’i Hesúpe: Ore Jára, ndoroikuaái ningo moõpa rehóta, mba’éicharupi piko ikatu roikuaa porã pe tape.