Popular Bible Verses from Yaya 15

Share

Né lée lɛ́zɛnnzunmɛɛ o lé, ále lée a bhóo ólu lé. Mɔɔn min ngɛ́ i gbɛ́nnɛnnin ndó né mán, né gbɛ́nnɛnnin ɲaankɛ o tíi ó mán, o tíi ó yáa sé kɛ́ kóbhɛɛ shɛ́ɛman ngɛ Ala yɛ́, kɛ mansɔɔ ni né sɔ́ɔbu tɛ́, ale tɛ́ sé kɛ́ fósi kɛ́ i yɛ́ɛ mán.

Áa í gbɛ́nnɛnnin ndó né man óyoo né gbɛ́nnɛnnin yé a man ɲánminman. Yilibhoo tɛ́ɛnin ŋó tɛ́ sé kɛ́ tó i kéenan kɛ́ i dhyé ngɛ́ i yɛ́ɛ mán ni a nɔlɔnin ndɛ́ lɛ́zɛnnzun ŋo man; o ɲán kée ŋó man, ní a man í gbɛ́nnɛnnin ndó né mán, a táa sé kɛ́ fósi kɛ́ Ala yɛ́.

Ní a kɛ́ i gbɛ́nnɛnnin ndó né mán, óni né ta kóman ólu kɛ́ tó a kɔ́ɔnnɔn, áa fé min nvɛ́, áa ó kófɔ a yáa o sɔ́ɔ.

A tɛ́ óo ale lée né lɔ́tɔnmɔn, né lée ále lɔ́tɔnmɔn kɛ́ a bhyáa ké áa táa kóbhɛɛ shɛ́ɛman ngɛ́ kóbhɛɛ min núu myɛ́nnan ké a kɛ fé ŋóo fé ngófɔ Fá o yɛ́ né tɔ́ɔla, a yáa ó dí a mán.

Kɛ i yɛ́ɛ ní ó dí i twáanva ólu kósɔn, bhyáaɲɔɔnya gbɛ́ɛ tɛ́ yé min ŋan físaa óle.

A bhóo mínnu tɛ́ i dhyé ngɛ́la, a yáa ólu tɛ́ɛ kɛ olu bhɔ́ yé. A bhóo mín núu i dhyé ngɛ́la, a yáa ólu bhóo mɛnsɛn ŋó bhɔ́ yé ne, ké aa sé kɛ́ dhyé nzhɛ́ɛman ngɛ́ kɛ́ tínmin síɲan jónan ó ka.

Né ta tɔ́ ŋo lée nin, áa dhyáaɲɔɔnɲɛn óyoo á ko a dí ne yɛ́ ɲán min mán.

Ni a kɛ́ kóbhɛɛ shɛ́ɛman ngɛ́, o lé káa kɛ́ tó Nvá é bwóɲan sɔ́ɔ, óni álee kɛ́ né ta kaamɔɔndhye né.

Ɛnza ŋé fɔ íkwɔ kó: «Né lée lɛ́zɛnnzunmɛɛ ó lé, Nvá lée sɛɛnkɛbhaa ó lé.

Ni mɔɔn min man i gbɛ́nnɛn né mán, o tíi ó wɛ́ɛ kɛ́ óyoo yilibhoo tɛ́ɛnin, íi a láfii kɛ́ɛnman aa já, íi a tá kɛ́ a síi tála aa ɲɛ́ɛn.

Né wɛ́ɛ ó kó ólu fɔ a yɛ́ ké áa nisɔdhyaa o sɔ́ɔ né fɛ́, óni ké a yɛ́ nisɔdhyaa o waa i lafa.

Ní a kɛ né yɛ́ tɔ́ ŋólu mánfa, a yáa tó né ta dhyáaɲɔɔnya o lɔ, óyoo née Nvá yɛ cé ólu mánfa ɲánminman kɛ́ tó a yɛ́ dhyáaɲɔɔnya ó lɔ.

Née min nvɔla a yɛ́ bhádhye ŋólu óle míin ne: ‹Aa dhyáaɲɔɔnɲɛn.› »

Ní a tɛ́ɛkɛ dínɲan ta le, a tɛ́ɛnan dhyáa dínɲan mɔɔn ólu yɛ, waa ale tɛ́ dínɲan ta le. Né lée álee lɔ́tɔnmɔn kɛ́ a bhɔ́ dínɲan mɔɔn olu cɛ́man, ó lé kósɔn, áa gbó dínɲan mɔɔn ólu yɛ́.