Popular Bible Verses from লূক 6

Share

দান্ গরঅ, সেক্কে গোজেনেয়ো তমারে দিবো, বোউত্ বেশ্ গুরি, চাপি চাপি, ঝাগেরে ঝাগেরে, উগুরি পড়েদে ধোক্ক্যেন্ গুরি তমারে দিয়্যে অবঅ, কারন যেবাবোত্যেগুরি তুমি মাবি দুয়ো সেবাবোত্যেগুরি তমাত্তে মাবা অবঅ।”

গম্ মান্‌‌‌জ্যে তা রিবেঙত্তুন্ গম্ কধা নিগিলেই আনন্, আর বজং মান্‌‌‌জ্যে তা মনত্তুন্ বজং কধা নিগিলেই আনন্। মান্‌‌‌জ্যর মনানি যিয়েনিলোই ভরা থায় মুয়োনে দঅ সে কধানি কয়।

মাত্তর্ তুমি তমা শত্রুগুনোরে কোচ্‌পেয়ো আর তারারে মংগল্ গরঅ। কিজু ফেরৎ পেবার্ আজা ন-রাগেনে উদোর্ দুয়ো। সালে তমাত্তে দাঙর্ বক্‌শিজ্ আঘে, আর তুমি দাঙর্ গোজেনর্ পুয়ো অবা, কারন তে অকৃতজ্ঞ আর পাজিগুনোরেয়ো দোয়্যে গরে।

তমা বাপ্পো যেবাবোত্যে দোয়্যেলু তুমিয়ো সেবাবোত্যে দোয়্যেলু অ।

“অন্যগুনোর দুষ্ ধুরিবাত্তে ন-নিগিল্ল্য, সেক্কে তমারেয়ো দুষি ধরা ন-অবঅ। অন্যগুনোরে সাজা পেবার্ যগাজ্যে বিলি মনে গরা ন-অবঅ। অন্যগুনোরে খেমা গরঅ, সেক্কে তমারেয়ো খেমা গরা অবঅ।

তুমি যিগুনে শুনোর্ তারারে মুই কঙর্, তমা শত্রুগুনোরে কোচ্‌‌‌পেয়ো। যিগুনে তমারে ঈচ্ গরন তারার্ ভালেদি চেইয়ো। যিগুনে তমার্ ভালেদি চান্ তারার্ ভালেদি চেয়ো। যিগুনে তমা লগে বজং বেবহার গরন্ তারাত্তে তবনা গরঅ।

মান্‌‌‌জ্যত্তুন্ তুমি যেবাবোত্যে বেবহার পেবাত্তে চঅ তুমিয়ো তারা সমারে সেবাবোত্যে বেবহার গরঅ।

যে তর্ এক গালত্ চুয়োড়্ মারে তারে অন্য গালানত্অ মারিবাত্তে দিস্। যে তর্ কাবরান নিবাত্যে চায় তারে সিলুম্মোয়ো নিবাত্যে দিস্। যিগুনে তত্তুন্ চান্ তারারে দিস্। কনজনে তর্ কনঅ জিনিস নেযেলে সিয়েন আর ফেরৎ ন-চেজ্।

গম্ গাজত্ বজং গুলোগুলি ন-ধরন্, আরঅ বজং গাজত্অ গম্ গুলোগুলি ন-ধরন্।

গুলোগুলিলোই পত্তি গাজরে চিনে যায়। তুমি কাদা ঝুবোত্তুন্ ডোমোর্ গুলো আর কাদা গাজত্তুন্ আংগুর ন-তুলোন্।