Popular Bible Verses from Lukas 6

Share

Kasi par orang laeng la Allah nanti kasi labe banya par kamong lai. Akang macang deng orang ukur apapa deng cupa sampe bombong la tindis akang, la tamba lai sampe tumpa-tumpa. Barang, deng ukurang yang kamong pake par orang laeng, Allah jua nanti pake akang par ukur kamong lai.”

Bagitu lai, orang yang bae kasi kaluar apa yang bae dari dia pung hati yang bae. Mar, orang yang jahat kasi kaluar apa yang jahat dari dia pung hati yang jahat. Barang, apa yang kaluar dari orang pung mulu, akang asal dari hati.”

Mar kamong jang biking macang bagitu-bagitu. Kamong musti sayang kamong pung musu. Biking bae par dong. La kalo kasi pinjang apapa satu, jang harap orang kasi pulang akang. Deng bagitu, Allah nanti balas deng kasi hadia basar par kamong. Deng bagitu jua, kamong kasi unju kalo kamong tu Allah yang Paleng Tinggi pung anana, tagal Antua pung hati bae par orang-orang yang seng tau minta dangke deng orang-orang yang jahat.

Jadi, kamong musti pung hati bae par samua orang, sama deng kamong pung Bapa di sorga jua pung hati bae par samua orang.”

Yesus bilang lai kata, “Jang nilai orang laeng, biar kamong jua seng dapa nilai lai. Jang hukum orang laeng, biar kamong jua seng dapa hukum lai. Kasi ampong orang yang biking sala par kamong, biar kamong jua dapa kasi ampong lai.

Waktu Yesus ada kasi balajar orang banya, Antua bilang kata, “Dengar bae-bae! Kamong musti sayang kamong pung musu. Biking bae par orang yang binci kamong. Sombayang minta Tuhan kasi berkat par orang-orang yang kutok kamong. Sombayang lai par orang-orang yang suka biking jahat par kamong.

Apa yang kamong mau orang biking par kamong, biking akang jua par dong.

Kalo orang tampeleng kamong pung pipi sabala, kasi pipi sabala lai. Kalo orang rampas kamong pung baju panjang luar, kasi tinggal dia ambe kamong pung baju lai. Kalo orang minta apapa dari kamong, kasi akang par dia. Deng kalo orang rampas kamong pung barang, jang minta akang lai.

Yesus bilang lai par orang banya tu kata, “Seng ada pohong yang bae yang kasi bua yang seng bae. Bagitu lai, seng ada pohong yang seng bae yang kasi bua yang bae.

Barang, orang bisa tau pohong tu bagus ka seng dari akang pung bua. Masa orang pete bua ara dari rumpu baduri ka bua anggor dari rumpu karanjang?