Popular Bible Verses from Lukas 9

Share

La Yesus bilang par samua orang yang ada di situ kata, “Sapa yang mau iko Beta, dia musti manyangkal dia pung diri la iko Beta. Dia musti pikol dia pung salib sabang hari. Beta pung maksud, dia musti salalu siap par dapa biking malu deng dapa siksa, biar kata sampe mati lai.

Tagal sapa yang usaha par kasi salamat dia pung diri, dia nanti seng bisa hidop tarus-tarus deng Allah. Mar sapa yang siap mati tagal iko Beta, dia nanti hidop tarus-tarus deng Allah.

Mar Yesus bilang par dia kata, “Orang yang su mulai bapacol di kabong la tinggal kong nganga ka balakang, dia pung karja jadi seng batul, jadi dia seng pantas karja di kabong tu. Bagitu lai deng orang yang mau karja par Allah. Kalo dia tinggal kong inga-inga dia pung samua-samua di dunya ni, dia pung karja jadi seng batul, jadi dia seng pantas par karja par Antua.”

Guna apa satu orang dapa dunya ni lapis deng akang pung isi samua, mar dia sandiri seng bisa hidop tarus-tarus deng Allah?

Jadi, jang malu par mangaku kalo kamong iko Beta deng Beta pung ajarang. Tagal sapa yang malu, Beta Ana Manusia ni jua nanti malu par mangaku kalo dia tu Beta pung murid waktu Beta bale kombali. Waktu itu, Beta nanti bale deng Beta pung kuasa yang hebat, Beta pung Bapa pung kuasa yang hebat, deng malekat-malekat kudus yang hebat.

Tarus Yesus bilang kata, “Anjing utang ada pung tampa par tidor, burung jua ada pung sarang. Mar Beta Ana Manusia ni, Beta seng ada pung tampa par taru kapala.”

La Antua bilang par Antua pung murid-murid kata, “Kalo orang yang parcaya Beta tarima satu dari orang-orang yang seng pung arti apapa macang deng ana kacil ni, itu dia su tarima Beta. La sapa yang tarima Beta, itu dia su tarima Allah yang utus Beta. Jadi, sapa dari kamong yang anggap diri seng pung arti apapa, dia tu yang paleng basar di muka Allah.”