Popular Bible Verses from यूहन्ना 12

Share

जे कुँऐं मेरी सेंवा करह्, तअ से मुँह पाछी आँव; अरह् जेथै हाँव असो, तेथै मेरा दास भे हंदा। जे कुँऐं मेरी सेंवा करह्, तअ बाबा तैस्की आदर-ईज्जत करला।

जुण्जा कुँऐ आप्णी जीयाँन-प्राँण आरी प्यार करह्, से तियों आप्णीं जीयाँन-प्राँण गुवाल़ी देला; अरह् जुण्जा कुँऐ संईसारी दे आप्णीं जीयाँन-प्राँण शो प्यार नें करदा, से अमर-जीवन खे आप्णें जीयाँन-प्राँण के रंक्षा करदा।

हाँव तुँओं खे ऐक खास बात बुलू, के जाँव तोड़ी गींऊँ का दाँणा जींम्मी दा पड़ियों मँरी-शड़ी ने ज़ाँदा, ताँव-तोड़ी से ऐक्ली ही रंह्; परह् जबे से मँरी-शंड़ी ज़ाँव, तअ तबे सेजा दाँणा हजो ऊँबा जाँमियों आपु दे फल़ियों बैजाऐ दाँणें फल़ आँणों।

हाँव जोत्त बंणियों ईयों संईसारी दा आऐ रूवा, जिन्दे लई सेजे बादे लोग, जुण्जे मुँह्दा बिश्वाष करह्; से ईनाँरे दे ने रंह्।

हाँव तेसी आदमी दोषी-कसूर बार ने बाँण्दा, जुण्जा कुँऐ मेरी खुषख्बरी शुँणियों तिन्दें का पाल़्ण ने करदा; किन्देंखे के हाँव संईसारी दा दोष-कसूर लाँदा ने आऐ रंई, परह् ईयों संईसारी खे छ़ुट्कारा करदा आऐ रूवा।

तबे मरियम ऐ च़ीन षौ ग्राँम खास-शुद्ध जटामाँसी को बैजाऐ मह्गों सैंन्ट आँणियों प्रभू यीशू के लात्तो गाशी पैरियों मुँल़ौ अरह् आप्णें मुँढों के बाल़ो लई तिनके लात्त ऊबे ऊबाँदी लागी; तेसी सैंन्ट की आच्छी खुष्बू बादे घरह् दी फय्ली रंऐ थी।

ईन्देंखे तिनू सोभी लोगे ऐं हाथो दी खज़ूर की डाल़ी करी, अरह् सू-स्वागतम् कर्दे प्रभू यीशू कैई आऐ; अरह् तिनू सोभिऐ ऐजा नाँरा लाया, “होसन्ना! होसन्ना! भागोईंत्त असो; इस्राएल का राजा, जुण्जा प्रभू के नाँव शा आँदा लागा।”

तबे: ऐजो शुँणिंयों प्रभू यीशू ऐ तिनखे बुलो, “सेजा बख्त्त आऐ गुआ; जबे आदमी के बैटे की बड़ियाऐं हंदी।