Popular Bible Verses from Juan 15

Share

’Chi nuꞌuꞌ, jee kúvi ni̱ꞌ kuéntáꞌ yokúꞌúꞌ káꞌnú yu̱ku̱ꞌ uva vá, jee ránoꞌó, chi kúvi rán kuéntáꞌ rá yokúꞌúꞌ kuáchí ya̱ kéne i̱ka̱ꞌ yokúꞌúꞌ káꞌnú vá. Chi néni ɨɨn ñɨvɨ ya̱ íñɨ́ ni̱ꞌin kino̱o kutú nu̱u̱nꞌ nuꞌuꞌ, jee suni kuiñɨ ni̱ꞌin ni̱ꞌ koo ni̱ꞌ jín ñɨvɨ vá, jee ñɨvɨ yaꞌá ví ya̱ sáꞌá tiñu váꞌa ya̱ kuíni Ndiosíꞌ. Chi retú ntu̱ví íñɨ́ ni̱ꞌin ñɨvɨ vá jín nuꞌuꞌ, jee kuéntáꞌ íyó sɨ́ɨ́n‑ɨ nu̱u̱nꞌ ni̱ꞌ, jee ni nkúvi na̱ saꞌá‑a ni ɨɨn tiñu váꞌa sáni kuíni Ndiosíꞌ.

Jee íyó kuiñɨ ni̱ꞌin rán kino̱o kutú rán nu̱u̱nꞌ nuꞌuꞌ, jee nuꞌuꞌ suni kuiñɨ ni̱ꞌin ni̱ꞌ koo ni̱ꞌ jín rán. Chi ɨɨn naꞌá yokúꞌúꞌ lúlí ntu̱ví kúvi máá maáa ku̱ꞌva‑a uva, retú ntu̱ví tɨ́ɨn táꞌán‑a jín yokúꞌúꞌ káꞌnú vá. Jee suni sukuán ránoꞌó chi ntu̱ví kúvi kueꞌnu máá maárán sáni kuíni Ndiosíꞌ retú ntu̱ví íñɨ́ ni̱ꞌin rán jín nuꞌuꞌ.

Retú íñɨ́ ni̱ꞌin rán kínóo kutú rán nu̱u̱nꞌ nuꞌuꞌ, jín retú ñúꞌún iniꞌ rán rá tu̱ꞌun ya̱ nkachiꞌ ni̱ꞌ nu̱u̱nꞌ rán, saájee kuvi ka̱ka̱nꞌ rán néni ɨɨn ya̱ kuíni rán, jee saꞌá ni̱ꞌ ya̱ kuvi ya̱ jíkánꞌ rán.

Chi nsú ránoꞌó nka̱ji rán nuꞌuꞌ, chisaꞌ nuꞌuꞌ nka̱ji ni̱ꞌ ránoꞌó ya̱ kɨꞌɨ rán nu̱u̱nꞌ ni̱ꞌ, jee ñani ni̱ꞌ ránoꞌó kuneeꞌ tiñu si̱kɨ̱ꞌ rán, sáva saꞌá rán tiñu ni̱ꞌ kuéntáꞌ kúun uva, sáva tiñu váꞌa vá kino̱o‑o kutú‑u. Sáva néni ɨɨn ka̱ka̱nꞌ rán nu̱u̱nꞌ Tátáꞌ ni̱ꞌ nu̱u̱nꞌ súví nuꞌuꞌ jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ jee taji re̱ꞌ maa nu̱u̱nꞌ rán.

Ni ɨɨn ñɨvɨ ntu ñúnúunꞌ‑u ka̱ꞌ nsú káꞌ yaꞌá: ya̱ ku̱ꞌva‑a maáa jee kuviꞌ‑i jie̱ꞌe̱ꞌ ya̱ váꞌa rá ñɨvɨ ya̱ kámani jín‑i.

Jee ntáká ñɨvɨ ni̱ꞌ ya̱ ntu jiáꞌnu sáni kuíni Ndiosíꞌ kúvi kuéntáꞌ naꞌá yokúꞌúꞌ ni̱ꞌ ya̱ ntu̱ví kúun uva, jee sííyo Tátáꞌ ni̱ꞌ maa, kuéntáꞌ sííyo ñɨvɨ naꞌá yokúꞌúꞌ. Jee ntáká rá ñɨvɨ ya̱ jiáꞌnu ichi Ndiosíꞌ kúvi ráa kuéntáꞌ naꞌá yokúꞌúꞌ ni̱ꞌ ya̱ kúun uva, jee sáꞌá re̱ꞌ jín ráa kuéntáꞌ nu̱u̱nꞌ sáꞌá noo re̱ꞌ rá yokúꞌúꞌ uva, sáva kuun ka̱ꞌ uva maa, jee suni sukuán sáꞌá re̱ꞌ jín ráa.

Jee yaꞌá kúvi máá tu̱ꞌun ya̱ tátúníꞌ ni̱ꞌ nu̱u̱nꞌ rán ya̱: Kunu̱u̱nꞌ rán inka rá táꞌán rán, kuéntáꞌ ñúnúunꞌ ni̱ꞌ ránoꞌó.

Jee retú jiáꞌnu rán sáni kuíni Ndiosíꞌ, kúvi rán kuéntáꞌ yokúꞌúꞌ kúun víꞌí uva jee yaꞌá kúvi ya̱ stúvi rán ya̱ kúñáꞌnú Ndiosíꞌ, jee suni sukuán kúvi nijia rán rá ñɨvɨ ya̱ súkuáꞌa ni̱ꞌ ránoꞌó níkɨ́nꞌ rán nuꞌuꞌ.

Jee nkachiꞌ tuku ka̱ꞌ Jesús: ―Nuꞌuꞌ kúvi ni̱ꞌ kuéntáꞌ yokúꞌúꞌ va̱ꞌa ya̱ maá nááꞌ nijia kúun ya̱ vixíꞌ naní uva, jee Tátáꞌ ni̱ꞌ Ndiosíꞌ kúvi re̱ꞌ kuéntáꞌ ɨɨn te̱e ya̱ kúmí yokúꞌúꞌ vá.

Jee ñɨvɨ ya̱ ntu̱ví íñɨ́ ni̱ꞌin jín nuꞌuꞌ, jee saꞌá sɨ́ɨ́n Ndiosíꞌ maa, kuéntáꞌ sáꞌá jín naꞌá yokúꞌúꞌ yu̱ku̱ꞌ uva ya̱ ntu̱ví jiáꞌa uva, jee náchi‑i. Jee nákeꞌen ráa maa, jee chúꞌun ráa maa nu̱u̱nꞌ ñuꞌunꞌ jee káyúꞌ‑u.

Nkachiꞌ ni̱ꞌ rá tu̱ꞌun yaꞌá nu̱u̱nꞌ rán, sáva kusɨ̱ɨ̱ꞌ iniꞌ ánímaꞌ rán kuéntáꞌ kúsɨ́ɨꞌ iniꞌ ni̱ꞌ, jee sáva chuchítú ni̱ꞌ nu̱u̱nꞌ kúsɨ́ɨꞌ iniꞌ ánímaꞌ rán.

Jee retú ñúꞌún iniꞌ rán ya̱ sikúnkuvi rán rá tu̱ꞌun ya̱ tátúníꞌ ni̱ꞌ, jee sukuán kino̱o kutú rán kuiñɨ ni̱ꞌin rán nu̱u̱nꞌ tu̱ꞌun ñúnúunꞌ ni̱ꞌ ránoꞌó, sánikua̱ꞌ ñúꞌún iniꞌ ni̱ꞌ síkúnkuvi ni̱ꞌ rá tu̱ꞌun ya̱ nta̱túníꞌ Tátáꞌ ni̱ꞌ nu̱u̱nꞌ ni̱ꞌ, jee kínóo kutú ni̱ꞌ íñɨ́ ni̱ꞌin ni̱ꞌ nu̱u̱nꞌ tu̱ꞌun ñúnúunꞌ re̱ꞌ nuꞌuꞌ.

Jee yaꞌá kúvi rá tu̱ꞌun ya̱ tátúníꞌ ni̱ꞌ nu̱u̱nꞌ rán ya̱: Kunu̱u̱nꞌ ɨɨn inka rán rá táꞌán rán.

Chi retánꞌ íñɨ́ i̱i̱ꞌ rán ichi jiáꞌnu rá ñɨvɨ ñɨ̱vɨ́ ya̱ ntu yɨ́ꞌɨ́ ráa xi̱ntíín Ndiosíꞌ, saájee íyó kunu̱u̱nꞌ ráa ránoꞌó, kuéntáꞌ ñúnúunꞌ ráa rá ñɨvɨ íñɨ́ jín ráa. Soo jie̱ꞌe̱ꞌ ya̱ nka̱ji ni̱ꞌ ránoꞌó ya̱ nsáꞌ kɨꞌɨ rán ka̱ꞌ nu̱u̱nꞌ ñujiínꞌ ñɨvɨ ñɨ̱vɨ́ yaꞌá jee ntu káꞌ jiáꞌnu rán kuéntáꞌ jiáꞌnu ráa. Jee jie̱ꞌe̱ꞌ saáva táꞌvi iniꞌ ráa néꞌyá ráa ránoꞌó.