Popular Bible Verses from ยฮ 17

Share

แม เฌา, แตห นา หมาน ลึบ แคง น็อห เฆ, โบง แตห เฆ แบน ดูอี อี ซีงา บอด. โฆรห ปี กาลาง แม ตี แฮะ มูห นา หมาน.

อาซาก กามาย ตี, อึณ ดี แตห เฆ นับ ซีคยา แม เฌา, อี มูห เฌาพรา อาคาคัร. อึณ มืร แตห เฆ นับ, อึณ มึห มี แม อู กาดัง นี. อึณ บอ แตห เฆ นับ โอว, อี มูห เฌา เยซู, วี ปี ตึย แม ตัห กอย ดี นี.

โอว ยี ตู ซาคึร มี ดาง เฆ. โอว ซาคึร บอ ดาง เฆ ดูอี อี หณึม โอว ดอ โทม เฆ โฆรห ปี กาลาง ดีแบ โอว ดี เฆ. โอว ซาคึร ดาง เฆ ดูอี ฌึร ตี, แตห เฆ บอกาเฆลียด แบน อู น็อห, แตห อึณ ปี บอ แม อี มูห ฆูณ โอว แฮะ กอย รึม โดบ โอว, อาว ปึอน กาย็อห. แตห เฆ อี หณึม บอกาเฆลียด กอย รึม โดบ อาย, แตห บอ เฆ ดูอี เฮา อี กอย แดง กาดาย กอ วี หณึม โอว. ปาย ตี เฆ ดี บอ นับ, อึณ มูห แม อี แฮะ ตึย โอว ตัห กอย ดี นี.

โอว ตู หมาณ, แตห แม แตห เฆ เลห แดง กาดาย นี. โอว หมาณ, แตห แม ฆ็อง แร เฆ, แกวะ แตห เฆ กาดูห อี ฮาย.

โอว แฮะ ฮอต ดัว ดี เฆ อาพูง ดังโคว ปี ดัว แม ดี โอว, แตห เฆ วี แบน อู น็อห, แตห อึณ ปี อาย แฮะ แบน อู น็อห. แตห อึณ ปี โอว กอย แคง น็อห เฆ ปี แม กอย แคง น็อห โอว. แตห แม โบง แตห เฆ แบน อู น็อห, แกวะ ฮู แตห อึณ มึห อาเซ อี แป ดี ลาย กาย็อห เฆ. ปาย ตี เฆ ดูอี แดง กาดาย ดี บอ นับ, อึณ มูห แม, แม แฮะ ตึย โอว. เฆ ดี บอ นับ, โอว แฮะ ร็อก เฆ ปี แม แฮะ ร็อก โอว.