Popular Bible Verses from Mateo 5

Share

Rrorrororo naco toqueuessizapa icanarrimauiuarrine rraraui. Quiquiza boco icanauiuarrine rraraui. Naza rrorrororo toqueuessizapa arra poua cacauittari nauizana cacauittari narrari, naui madirra oza bodiuarri madimanarrarideni bazima ssiuarrani carrimanauiuarrine. Tissiuerrenedenipe pina narraro ssiuarranissa tiquenarraro, madirra bazimaza tossiuarrabaqquiniuarrine. Uima bicani titinanemana narraro, madirra bazima qqui toquenauiuarrine. Nema tinanemanezape Abi Deo memeuarri madirrariza pouaza uatizemanaza: “Deopa bica taui” quenauiuarrine −nade Zeso.

—Tiadeni arri ouaza rrehe tiquenarrarope pina arrirraro zamacca ssiuarranissa tiquenarraro. Ossiuerrene ticarrimanezape zama uapimacca madirraza otauimari tirrinedeni auatorizarraro. Tissiuerrenedeni auato tezape pina oza panani ssono tetepiuarri auato tarrarossa narraro. Ssonocca oza pananipe narrimaniuarrine ssamo tani.

—Tibodideniza Deotouira tiquenezape ticcadeni uima carrima-rrerezape Deopa tibodideniza uatizeheri inanarraro. Rridapanapa Deo tiadeniza torrizerarrari. Niza memeuarripa Deo Poua qqui tiquenauitoui.

—Tibodidenipe pina: “Occa uima Deoza parrirenissa taccaraho, Poua Attissa onananiuarrine damera onana” tiquenezape Deopa tibodideniza uatizeheri inanarraro. Tibodideniza nacassa tinarrarocca Deo tiadeniza inananitoui.

Naraha ouattipe arrima onarraro: Tiadeni uauadidedeniza naqui pina tetideni uanaqquiri narri. Tiadeni narrizodedenipa Deo pouadeni bodi acco icanabaqquiuiuarrine Deoza uati uati tiquenana, onarraro.

—Tiadeni motta tibodideni tobicaniuarrine tiparriremane-rrerani nauatoqquiri tiquenezape Deopa tibodideniza uatizeheri inanarraro. Deocca cacauehe tiadeniza torranitoui.

—Madirra ouaha tirrinedeni carronerazapa Deopa tibodideniza uatizeheri inanarraro. Deopa tiadeniza: “Occa erredenideni” narrari.

—Tibodideni uanacosseza orri tiqueneraha Deopa tibodideniza uatizeheri inanarraro. Deo tibodideni acco canauitoui.

—Deoza dameraqquiri tiqueneza Poua Attissa tinanemanezape rrehe quena-rrararrarideni tiadeni tonarrizo-baqquimanaraha Deopa tibodideniza uatizeheri inanarraro. Deocca cacauehe tiadeniza torranitoui.

—Tiadenipe madirraza tetideni uanaqquiri neza pouadeniza uima torrezape pouadeni acco ticanabaqquimanazapa Deopa tibodideniza uatizeheri inanarraro. Deopa tiadeniza naco uati uana tauitoui, tiadeni acco tocanabaqquiuitoui.

—Occa madirra tiquerrenarrarorrinepe madirra tiadeni totamasso-baqquimanaza, tiadeni tonarrizo-baqquimanaza, ticcadeni uima touaidiraniuarrine maiza maiza quenaza naco Deopa tibodideniza uatizeheri inanarraro. Tetizemanarri. “Peperri bica tani” tiquenarri. Memeuarri bacco tiquenezape Deocca danirri bicabote ticarrimananitoui. Maittaccazama naco Deoza nacasseraqquiri narraridenipa arra Deo Atti cacomeraqquiri narrarideni inarrizo-baqquimanarra narronapoui narrari −nade Zeso.

—Tiadeniza uima uaidira tanicca bacco teraha tedimana-rrereza tibodideni: “Niza Deo oua acco canauitoui” tiquenezape Deopa tibodideniza uatizeheri inanarraro. Niza Deorrine zama zati torreza narrarope ticcadeni cacauehe torranitoui.

—Tiadeni arri ouaza rrehe tiquenarrarope pina sahocca uimassa tiquenarraro. Sahope bani bica tauiuarrine. Arri tiadenipe pina sahossa tiquenarraro, arrirraro zamacca madirra tinanabicabaqqui-manauiuarrine. Saho arriboni amossi nezape arriboni carripomaniuarrine ssamo tani. Nezape tiadeni naqui arrirraro zamacca madirraza uima bicani tinanemanarizaniuarrine tinebomana tiquenerrerarri ticcadeni rrehenirri ponima torra-rrerana. Saho ponima torrezape madirra coro iqueneza madirrarrine ttai ttai torra tani.

Ticcadeni Abi Deo memeuarri madirraripa pocca touati uanehe parrirenissa tarraro. Tiadeni naqui tinaparriremananissa tarri, pina ticcadeni Abi Deocca touati uanehessa tinanemanana, onarraro −nade Zeso.

Nazama tiadenipe parrissa tiqueneza parrissehera: “Rrehe, parrissa” tiquenarri. Naraha poni tiqueneza naqui “Rrehe, poni” tiquenarri. Peperri! Nema narrarora uati tiquenaniuarrine bica tani. Neraha tettidenipe touatti onihi tazarrani tinatassaqquimanezape bica terrerani. Narrarope pina mamaizadedeni attidenissa narraro −nade Zeso.

—Ticcadeni ididenicca marinarra timittemanarronarrarope arrima narraro: “Madirra ouaharrine tinocco sia tezape manaco poua nocco sia tinanazapa bica tani. Tino naqui. Madirra ouaharrine tino rrai tocanezape manaco poua ino rrai ticananaza bica tani” quequenanade. Manaco manacope nema narronemanarrari. Neraha ouattipe tiadeniza arrima onarraro: madirrapa tiadeniza uaidirehe inanezape “Manaco” tiquenerrerarri. Madirra tipano idaniza naco “Ouaccone manaco odana” tiquenerrerana, onarraro.

—Nazama uimasiri tinana-rreraniuarrinepe tibodiza daco tirrireza poni tarri. Poni terrerezape uima oppina tani tiaza ssonarinitoui. Nazama pina tinocco nauatoniccaza touini tanicca qqui tinezape narraroza uimasiri tinananiuarrine touini teraha daco tirrireza poni tarri, uimasiri tinana-rreraniuarrine. Nema tezape pina tinocco nauatonicca uari, rroca, rreo, coro tinarrarossa narraro, uimasiri tinana-rreraniuarrine. Tinocco orrarie amossi neraha peperri! tessirema tissiuauanitoui. Rrororoni rriquerreraniuarri tirra-rreranitoui. Nazama pina tizepe nauatoniccaza uimasiri tinanabote neraha daco tirrireza poni tarri, uimasiri tinana-rreraniuarrine. Nema tezape pina tizepe nauatonicca ca ticarrizarrarossa narraro. Tizepe carrarie amossi caneraha peperri! tessirema tissiuauanitoui. Rrororoni rriquerreraniuarri tirra-rreranitoui −nade Zeso.