Popular Bible Verses from JUAN 14

Share

Canguna llaqui illaj causaita charichunmi, Ñucapaj cushijuita cuni. Chashna causaitaca, cai pachapica pipash na cungachu. Cangunapaj shungupica, na llaquirishpa manllarinachu canguichi.

Shina nijpimi Jesusca cashna nijurca: “Ñucallami ñan cani. Na llullashpa villajpashmi cani. Causaita causagrinata carajpashmi cani. Ñuca Taitapajman Ñuca na pushajpica, pipash na chayagri ushangachu.

Cangunapaj shungupica, na musparinachu canguichi. Ashtahuangarin, Taita Diostapash, Ñucatapash crinami canguichi.

Ashtahuangarin, Ñuca Taitaca, shuj Cushichij, jucha illaj Espiritutami Ñucapaj shutipi cachamunga. Paimi, tucuita yachachijunga. Shinallata Ñuca, cangunaman imata villajushcatapash tucuitami yarichijunga.

Ñuca mandashca shimicunata chasquishpa pactachishpa causajcunallami, Ñucataca juyahuan. Ñucata juyajtallami, Ñuca Taitapash juyanga. Ñuca juyashpami, Paita juyajushcataca ricuchisha” nijurcami.

Shinallata, shuj Cushichijta cangunaman carachunmi, Ñuca Taitataca mañasha. Paimi cangunahuan causaita causajunga. Cai pachapajtalla rurashpa causajcunaca, chai na llullaj Espiritutaca na chasquingallachu. Paicunaca, na ricushca, na rijsishca cashcamandami na chasqui ushanga. Ashtahuangarin, cangunaca, cangunahuan causajujpi, ña rijsishca cajpimi, Paica cangunahuan causaita causajungalla.

Imata cashpapash, Ñuca shutipi, Ñuca Taitata mañajpica carashallami. Paipaj Churimanda Taita alicachi tucushca cachunmi, chashna carasha. Ñuca shutipi imata mañajpipash, carashallami.

Ñucata juyashpaca, Ñuca mandashca shimicunatami pactachina canguichi.

Ñuca Taitapaj llactapica, ashtaca huasicunami tiyan. Na shina cajpica, Ñucallata ñami villaiman carcani. Canguna chaipi causachunmi alichingapa rigrijuni.

Ñuca rishpami canguna causanataca alichina cani. Chai jipami, Ñuca causajuj llactapi cangunapash Ñucahuan causachun pushangapa cutin tigramuna cani.

Shina nijpimi Tomasca, cashna nirca: “Apunchi Jesús, Can maiman rijujtapash na yachapanchica, ¿imashnata ñandacarin rijsishunyari?” nirca.