Popular Bible Verses from ᤋᤥᤗᤡᤱᤛᤥᤔᤢ 32

Share

ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤁᤧᤔᤡᤱ ᤕᤠᤁᤢᤒ ᤔᤣ᤺ᤴ ᤁᤖ ᤀᤡᤛᤪᤠᤀᤡᤗ ᤐᤥᤱ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ ᤁᤧᤎᤰᤋᤧᤀᤠᤱ ᤁᤧᤏᤠ᤺ᤴᤍᤢᤖᤥ॥”

ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤂᤠᤀᤥ᤺ᤵᤔᤠ ᤆᤥᤰ. ᤀᤠᤱᤃᤠ᤹ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹॥” ᤁᤖ ᤕᤠᤁᤢᤒᤖᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤔᤢ᤹ᤀᤡᤛᤠᤶ ᤁᤧᤶᤒᤡᤀᤠᤴᤗ ᤌᤠᤖᤡᤰ ᤔᤧᤗᤧᤳᤏᤧᤴ॥”

ᤀᤰᤂᤣᤗ᤹ᤖᤡᤰ ᤕᤠᤁᤢᤒᤧᤴ ᤀᤣ᤺ᤰ ᤕᤠ᤺ᤰᤋᤧ॥ ᤜᤧᤰᤁᤩᤠᤱ ᤗᤳᤇᤠ ᤔᤏᤠᤎᤡᤰ ᤂᤠᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ᤏᤢ ᤆᤢᤅᤧ॥

ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤂᤧᤴ ᤋᤧᤴᤏᤡᤴ ᤐᤏᤡᤀᤣᤗ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤛᤢᤱᤅᤠᤱᤛᤠᤱ ᤀᤠᤱᤃᤠ᤹ ᤁᤢᤜᤡᤱᤘᤧᤳᤋᤣ ᤘᤠ᤹ᤀᤠᤖᤥ” ᤗ᤹ᤖᤡᤰ ᤂᤢᤏᤧ᤹ ᤐᤠ᤺ᤳᤋᤢ॥

ᤂᤧᤴ ᤔᤏᤠ᤺ᤸᤗᤧ ᤕᤠᤁᤢᤒᤧᤴ ᤏᤠ᤺ᤶᤔᤠ ᤔᤧᤛᤢᤰᤋᤢᤶᤒᤠ ᤏᤡᤛᤢᤀᤠᤱ ᤂᤧᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤓᤡ᤺ᤵᤔᤧᤴ ᤛᤢᤛᤢ ᤐᤡᤖᤢ. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴᤏᤢ ᤆᤢᤅᤧᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤅᤡᤴ ᤗᤡᤄᤧ᤹ ᤗᤧᤴᤍᤧ॥

ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤁᤧᤔᤡᤱ ᤌᤣᤃ᥅” ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤕᤠᤁᤢᤒ॥”

ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤁᤧᤔᤡᤱ ᤌᤣᤃ᥅ ᤔᤧᤳᤋᤠᤱᤅᤧ᤹॥” ᤁᤖ ᤂᤧᤸᤗᤧ ᤔᤧᤳᤋᤢ. “ᤌᤣᤀᤠᤱ ᤀᤠᤔᤡᤱ ᤛᤧ᤺ᤴᤃᤧᤍᤥᤀᤠᤒᤣ᥅” ᤂᤧᤒᤩᤠᤱ ᤕᤠᤁᤢᤒᤧᤴ ᤔᤢ᤹ᤀᤡᤛᤠᤶ ᤐᤡᤖᤢ॥

ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤀᤢᤛᤣ᤺ᤴᤎᤠᤱ ᤁᤧᤈᤥᤃᤢᤒᤠ ᤗᤢᤱᤔᤠ᤹ ᤋᤢᤰᤔᤧᤴ ᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤔᤠ ᤐᤠ᤺ᤴᤏᤧᤴ ᤀᤠᤱᤃᤠ᤹ ᤔᤡᤛᤠᤰᤁᤠᤱ ᤔᤧᤗᤠ᤹ᤀᤠᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤷᤍᤏ ᤕᤱᤄᤱᤅᤡᤴ ᤁᤠ᤺ᤰᤋᤢᤱᤅᤠᤱ ᤑᤧᤖᤠᤱᤅᤡᤸᤗᤧ ᤗᤳᤇᤠ ᤋᤰᤁᤠᤳ ᤌᤡᤰᤗᤰ ᤑᤧᤳᤋᤢᤱᤅᤠᤱ ᤘᤕᤧ॥ ᤁᤖ ᤀᤠᤸᤗᤥ ᤁᤢᤗᤢᤵ ᤏᤧᤳᤇᤡ ᤜᤡᤶᤛᤕᤱ ᤏᤢ ᤁᤶᤓᤩᤠᤖᤡᤰ ᤕᤖᤡᤰ ᤌᤰᤛᤠᤜᤠ᤹ ᤁᤳᤋᤢᤱᤛᤡᤱ᤹॥

ᤂᤧᤴ ᤔᤏᤠ᤺ᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤓᤡ᤺ᤵᤔᤥ ᤛᤢᤛᤢ ᤐᤡᤖᤢ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗᤥ ᤌᤠᤖᤡᤰᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤗᤠᤱᤓᤡ᤺ᤵᤔᤥᤒᤠ ᤛᤠᤴ ᤔᤧᤴᤈᤏᤧᤸᤗᤥ॥

ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤀᤠᤴᤎᤧᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤀᤠᤶᤒᤠ ᤀᤡᤛᤜᤠᤰᤁᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤠᤀᤣ. ‘ᤂᤧᤏᤧ᤹ ᤀᤠᤒᤠᤅᤣ ᤁᤧᤗᤠᤈᤣ᤹ᤀᤥ ᤜᤧᤰᤁᤩᤠᤱ ᤁᤧᤃᤠ᤹ᤀᤡᤜᤠ᤹ᤀᤥ ᤏᤢ᤺ᤰᤂᤧ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤏᤧᤖᤥ’ ᤁᤧᤔᤧᤳᤋᤠᤱᤅᤠᤱ ᤘᤕᤧ॥

ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤖᤥ. ᤀᤠᤶᤓᤢ᤹ ᤀᤣᤛᤠᤒᤖᤧ ᤁᤢᤜᤢᤰᤁᤥᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤁᤢᤶᤔᤠ ᤁᤢᤛ᤻ᤛᤠᤜᤠ᤹ᤀᤠᤱ ᤁᤧᤖᤧᤰ ᤛᤧᤖᤡᤃᤧᤒᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤢᤏᤧ᤹ᤏᤢ ᤁᤡᤀᤠᤖᤥ॥