Popular Bible Verses from โรม 5

Share

หม่าแน๊เรอ จอแปแหร่ โม เจ๊อ เป บ๋า เต เฮ๊เรอ, เบ๊อะเป ทวาปา เจ๊อ เพรเมเตซื๊อ เตโอ่หร่าพู๊ เบ๊อะเนอ ปา เจ๊อ เนอเรอ, ครี๊ แฮข่าเซอ อาซิปล่อ เด๊อ เปเง. เออ หม่า จอแปแหร่ เด๊อะโลเป่เฮ๊อ เป เน๊อ อาเตโม เป เฮ๊อ.

เบ๊อะเป แม๊ชือ เร๊อ จอแปแหร่ เก่ เม เป่ เป เบ๊อะเนอ, เป ซิปล่อปย๊า โต่, เมเตเฮ๊เรอ, เบ๊อะจอแปแหร่ เด๊อะตา เป แหย่โยบูโพ๊ แบ่เจ่ เบ๊อะเนอ, อา กลอ แล แล๊แล เป่เฮ๊อ เป อาเตโม เด๊อ เป ซิปล่อกู เฮ๊อ.

เป แม๊ชือ ตื๊อแพ๊ เออเนอ หม่าโต่, เบ๊อะเป แม๊เถอะ เร๊อ เตจาเตจือ, เตแป่เตเช เบ๊อะเนอ เบ่เบ่, เป ซิครือซิลอ แพ๊, เมเตเฮ๊เรอ เป ซิเง เร๊อ เต เออเต๊เห่เนอ อา เด๊อะ เอ๊แถ่ เป่ โป่ เป เตข่าเบ่ เตจาเตจือ แพ๊. เตข่าเบ่ เตจาเตจือ เนอ อา เด๊อะ โอ่เอ๊แถ่ เตเมโต จอแปแหร่ อาซิปล่อ, เตเมโต จอแปแหร่ อาซิปล่อ เนอ, อา เด๊อะ โอ่ทวาแถ่ เอ๊โป่ เตแม๊ชือ.

ฮู๊เนอเรอ จอแปแหร่ แด่จ๊อแด่เต เฮ๊อ เป เร๊อ เป เตหยื่อเตแหน่ อาคยา เฮ๊อ. เป โอ่โอ่เพรโอ่ดือ โอ่โครโอ่เกล เต่อ คยาแซ๊ เฮ๊อ เร๊อ จอแปแหร่ เฮ๊อ. เพร เม ทวาแถ่ เป่ เป ฮู๊เออเนอหม่า หม่าเฮ๊อ เป แบ่เจ่ เหย่ซู่ครี๊ เฮ๊อ. เด๊อ เป หยื่อเอ่ แบ่เจ่ เหย่ซู่ครี๊ อาขว่าอาคยาเร๊อ, อา นอ โอ่เซอเพร เฮ๊อ เป เด๊อ จอแปแหร่ อาบุ๊ยอาเตอเรอ อากู เฮ๊อ. กู๊แหน่เออ เป โอ่เซอเพร เกอเฮ๊อ เด๊อ อาบุ๊ยอาเตอเรอ อากู เฮ๊อ. เร๊อ เป ซิครือ แม๊ชือแม๊ตู่ เกอ เฮ๊อ จอแปแหร่ อา เตอเรอดุเตอเรอทู เออเนอ เฮ๊อ.

เมเตเฮ๊เรอ, เบ๊อะเป เมจว่า แลเบ๊ แจ่ เกอเร๊อ ปา เปเหน่ โต่ เบ๊อะเนอ, เหย่ซู่ครี๊ แฮข่าเซอ ม๊อเนอม๊อเซ โตเป่ แกแยจา แกแยจือ เต๊เห่ อาเง.

เป ทวาเฮ๊อ แกแยจ๊อแกแยเต เด๊อ จอแปแหร่ อา เป๊เส่เง เร๊อ ครี๊ อาสุ่ย ขว่าคยา เฮ๊อ. ฮู๊เนอเรอ ครี๊ เก่ เมแลเปล๊กา หม่าแหน่ เจ๊อ เป เร๊อ จอแปแหร่ อา เตเมจากาคยา เออเนอ ปา.

เมเตเฮ๊เรอ เด๊อ แกแย เตเพร หนิดา จอแปแหร่ อาโหง่ โต่ อาขว่าอาคยา, แกแย ปว๋า เตเพร ทวาลอ เฮ๊อ เตซื๊อเตปล๊า อา พู๊เหมาะพู๊คู เต๊เห่ เฮ๊อ. หม่าแน๊เรอ เด๊อ แกแย เตเพร หนิดา จอแปแหร่ อาโหง่ อาขว่าอาคยา, จอแปแหร่ แด่จ๊อแด่เต ลอเฮ๊อ แกแย ปว๋า เตเพร เฮ๊อ.

เป เหล่ซิครือซิลอ เนอ อาโอ่ ตื๊อ เออเนอ หม่าโต่. เด๊อ แบ่เจ่ เหย่ซู่ครี๊ อาขว่าอาคยาเร๊อ, เป ซิครือซิลอ แบ๊ซว๊าหนิ เฮ๊อ เร๊อ จอแปแหร่ เฮ๊อ. เพร เด๊อ อา เม แบ๊ซว๊า กาคยา เป่ คยาแซ๊ เป เร๊อ จอแปแหร่ หม่า เหย่ซู่ครี๊ เออเนอ เฮ๊อ.