Popular Bible Verses from मार्कुस 12

Share

येसुङा लु, “घाक हाक्‍निङ् माडा आग्‍गे ना ओम– ‘ओ इजिरेलबेॽहा याॽमिचि खेप्‍सानुम! एङ्‌गा हाङ्‌बा निङ्‌वाफुमामाङ् एको सेॽना हाङ्‌बा ओम॥ न्‍दा ङ्‌गा हाङ्‌बा निङ्‌वाफुमा ङ्‌गा घाक लुङ्‌माङा, ङ्‌गा घाक हिङ्‌लुङ्‌ङा, ङ्‌गा घाक निङ्‌वाङा न्‍हाङ् ङ्‌गा घाक साक्‍तिङा न्‍लुङ्‌मा तुक्‍तु॥’ न्‍हाङ् हिम्‍ना आग्‍गे च्‍हेन ना ओम ‘ङ्‌गा पाङ्‌निवाक न्‍दा लोॽवा न्‍लुङ्‌मा तुक्‍तुचि॥’ खा हाक्‍निङ् माम्‍माहा आग्‍गे मानिन्‍हा॥”

न्‍हाङ् येसुङा उका चेलाचि काचिहोङ् खाॽला लुचि, “जेप्‍पा का न्‍निङ्‌दा लुम्‍मेॽनेनिन, ना तुखिसुम्‍मा लाङ्‌निमाङा घाक हाक्‍निङ् प्‍याक भेटि एन्‍दुक्‍सुहा॥ इजाङ्‌बाङ्‌निङ् ङ्‌खाचि घाकङा ङ्‌ङोन्‍दुहा याङ्‌साभाङ् मिॽयाङ् भेटि ङ्‌ङेन्‍दुक्‍सु, ङ्‌खाॽनिङ्‌गो ना लाङ्‌निमा तुखिसुम्‍मा होङ्‌चा उका घाकथोक चोक्‍माहा याङ् नाबे एन्‍दुक्‍सुहा॥”

येसु निङ्‌वाफुमापाङ्‌बे भेटि एम्‍माना याङ्‌धाङ्‌गा उयुम्‍बे युङाहोङ् याॽमिचिङा भेटि ङ्‌ङेन्‍दुहा सोॽमास्‍या॥ न्‍नाबे प्‍याक थुङ्‌दुहा याॽमिचि न्‍दाया न्‍हाङ् ङ्‌खाचिङा प्‍याक-प्‍याक भेटि ङ्‌ङेन्‍दु॥ ङ्‌खिङ्‌बेला एको तुखिसुम्‍मा लाङ्‌निमा चा न्‍नाबे तायाहोङ् हिच्‍चि ताबागा याङ् एन्‍दुचि॥

न्‍हाङामाङ् निङ्‌वाफुमा घाक लुङ्‌माङा, घाक हिङ्‌लुङ्‌ङा, घाक निङ्‌वाङा, घाक साक्‍तिङा लुङ्‌मातुक्‍मा, न्‍हाङ् पाङ्‌निवाकचि चा आफाइ लोॽवा लुङ्‌मा तुक्‍माहाचि॥ मिबे हुयाहोङ् तिसाहा घाक खाले बोलि नुङ् बोलिदान हाक्‍निङ् खा हिच्‍चि आग्‍गे पालाना चोक्‍मा माडा चेॽया ओम॥”

न्‍हाङ् येसुङा ङ्‌खाचि लुचि, “ङ्‌खाॽलाभोङ् हेखा काइसारगा ओम, ङ्‌खा काइसार माङ् पियानुम न्‍हाङा हेखा निङ्‌वाफुमागा ओम, ङ्‌खा निङ्‌वाफुमा पियानुम॥” येसुगा खाॽलाना पोलोवा ङ्‌खेप्‍सुहोङ् ङ्‌खाचि आच्‍चाम्‍मा ङ्‌ङेता॥