Popular Bible Verses from Jân 21

Share

O bâ‐ba makidě ija, Jisus a vâki na Saimân Pitě, na, Saimân mwan‘ ’a Jonas, o tândâkâte ’Mba wa na ekaba? A vâki na ju, na, E, Upangiyi: o yowuděte na mbi tândâkând‘ Âvě. A vâki na ju, na, Bombaka bana bamě ba medâmbě. A vâki pě na ju njo y‘ ibalě, na, Saimân, mwan‘ ’a Jonas o tândâkâte ’Mba? A vâki na ju, na, E, Upangiyi: o te yowěngo na mbi tândâkând‘ ’Âvě. Jisus a vâki na ju, na, Jakidě medâmbě meamě. A vâki na ju njo y‘ ilalo, na, Saimân, mwan‘ ’a Jonas, o tândâkâte ’Mba? Pitě a yěněki ngěbě, ’kabojana a vâki na ju njo y‘ ilalo, na, O tândâkâte ’Mba? Ka mâ‐a vâ na ju, na, Upangiyi, o yowuděndi belombo beěhěpi; oa dimbakiya na mbi tândâkând‘ Âvě. Jisus a vâki na ju, na, Bombaka medâmbě meamě.

Mbi vâki na nâvě pâkwěpâkwě mětě, na, o ’Âvě o diyakidi iwanja o ma tingakandi utumba o nyolo ’âvě, na nâvě o tamwaka o loboko lâvě lo vahakidi; ndi o âvě o ka wě o ka hambidi makadu mâvě n‘ upâkwě a ka bâtiděnd‘ âvě, na mâ‐a ka bapakě âvě, o iboko viâvě vi ka diyě o vahe.

Ka Mâ‐a vâ na bâ, na, Uwakani elâba o pělě ya ’lende eyomi, vâkâna o duwindini. O bâ‐ba diyaki uwango, bu yâlâkě o dula elâba na bejaka bwinge.

Saimân a vâki na bâ, na, Mb‘ ’alandi o ’hombo. Ba vâki na ju, na, Ho ’alandi tepě na nâvě. Ka bâ‐ba vala na hunganaka o vama o elende; bu weyaka elombo ka ’lombo na bulu těboně.