Popular Bible Verses from Marko 13

Share

T'mer patsenn ap mande. Doleske venn i tsele menshe rhoyedo ap t'mende. Kova, kay ačell zoreles tardo an o patsepen, yaake rah, har yob djivella, kova lell o Debleskro djipen.

Denn yak! Rikrenn t'mare yaka pre! T'mer djinenn gar, kaana hi ko tsiro kay.

Te taprenn le t'men, te anenn le t'men glan i čačepangre, ma darenn, hoy hounte penenna! Ap ko dives, kay han glan lende tardo, sikrell o Devel t'men, hoy te penenn lenge. Kova rakrenna! Ma bistrenn, t'mer han gar kolla, kay rakrenna. Kova hi o Debleskro Dourho, kay dran t'mende rakrella.

O bolepen oun i phoub ačenna gar. Mire laba ačenna hako tsiro.

Kek djinell ko dives oun ko tsiro, kay kova lauter vella. I bolepangre an o bolepen djinenn les gar, vitar gar o Debleskro čavo. Miro dad an o bolepen kokres djinell les.

An ko tsiro hi kourepen an kol themma, kay hi dour t'mendar oun ninna an kol themma, kay hi gar dour t'mendar. T'mer te shounenn kova, ma trashenn! Kova hounte vell yaake. Ko tsiro, kay i phoub paash djala, vell gar yaake sik.

Yaake penau t'menge: Rikrenn t'mare yaka pre! T'mer djinenn gar o tsiro, kay o ray pral o kheer pale vella. Yob nay vell ap i rati, nay vell mashkral an i rati, nay vell ap ko tsiro, kay dell o bashno gole, nay vell taysarlake. Yaake denn garda, te hatsell lo t'men gar ap o sopen, te vell lo ap yek kopo. Kova, hoy me t'menge penaua, ko penau lauterenge: Denn yak oun sovenn gar!

I pralstoune pral bare themma kourenn pen i vavar pralstunentsa. Oun i menshe dran yek them marenn i menshen an i vavar them. Oun kate oun kote vell i phoub trisslemen. Boud menshen hi gar doha te rhal. Kova lauter vella yaake pral i phoub, har i douka venna pral i djouvyate, kay lell i ternepen.

Glan ko tsiro, kay i phoub paash djala, hounte vell o lačo lab mandar penlo an i tsele themma.

Koy venna boud morsha, kay penenna: Me hom o Kristo, ko baro ray, kolestar o Devel penas, te vell yob. Oun boud menshe patsenn ap lengro rhorhepen.

Denn yak ap t'mende! T'mer venn glan i čačepangre anlo, oun rhan dava an i biboldengre kangria. T'mer patsenn ap mande. Doleske anenn le t'men glan i pralstoune oun glan i bare rayende, te rakrenn yon i phagi vin pral t'mende. Te han glan lende tardo, palle nay rakrenn t'mer mandar, te shounenn yon pral mande o čačepen.

Rhorhene morsha venna oun penenna ap t'mende: Me hom o Kristo. Oun i rhorhene rakepangre penenna: Me vom o Deblestar bičedo. Oun yon krenna baro oun zorelo koova, hoy i mensho nashte krell gar dran peskri zoor. Te djals kova, anans le kolen o Debleskro dromestar tele, kolen o Devel peske vin rodas.

An kol divessa pal ko čilačo tsiro, vell o kham kalo har i rat, oun o moonto dikell kek bouder. Oun i bare momlia ap o bolepen perenn tele. Oun o bolepaskri zoor perell khetne.