Popular Bible Verses from Wenía 50

Share

Matõvísi ea mã ichnák pakekatsiyãtá. Askámẽkĩ ãatõro roã pakekésho ea nitxĩmtá, yora westíma ato ave vestẽ anõ iinã, naaivo shavapa.

“askáma, rakétsomároa. Eanã Yovévisirora mã oĩinã?

Askáinã rakétsomároa, eã, matõ vakerasĩnĩ ashõ mato ẽ vesokatsa”, iinã rawe vanã ato ãwẽ akátõsho, matsipakétivo.

‘José neská atsoma’, iinã noke tanamavai. ‘“Mĩ takevo anõ itimatõ atõ iti ivo, atoki ichná akĩ chinãóroa”, atsoma’, noke avai. Ramaro minõ nõ ichná akĩ chinãmtá ivo, nokemẽ ichná akĩ chinãóroa. Nokero mĩ papã Yové mee ishõya ivo yora keská noke”, akávo. Aská akĩ atõ vana yonoshoa, nĩkãinã, José wai ikí.

Askávai txipo Josepa vopikatsikawãki, ãwẽ takevo kenasho ato vana akĩ. “Mato ẽ enekatsa, askámẽkĩ Yové Koĩni mato take akí okatsai. ‘Mai mato ẽ inãkatsa’, iinã tavámatima ivo vanã, Abraão, Isaque, Jacó aatii, ato tanamati. Askásho nenosho mato kawivaĩsho aaivo maĩ mato shokõkatsa”, ato akĩ.

Aská avaikĩ, “ramaro vana tavámatima ivo ea ashõna. Ẽ vopia txipo Yové Koĩni mato take akí omaĩnõ, ẽ shaorasĩ kawivaĩtátsoma”, ato akĩ.

Askái anosho José 110 varinamãsho, vopimaĩnõ, rayá patósma ivo raõ avaikĩ kavõ ichnáma ivõ nanetivo.