Popular Bible Verses from Tiago 3

Share

Askámaĩnõ matxisho oá ivo yosí tanayaro neská. Yoramẽ ranótái, ichnátana yama, yora ranokásmasma, chinã roaya, yora onis ati chinãya, roapa ivorasĩ ato ashõya, yora wetsa anõ noíkaki oĩi, wetsaro anõ noíkimase oĩi amísma, chinãne pãté imísmase aká.

“Askávaíse wetsaro, mato wetsase Yové Koĩni yosí, yosí wetsase aká ayará? Aská ayashoro roai yosíkai shokosho mã akárasĩ ato mã oĩmati, marí ravítáimai shokosho.

Askávaíse yora, ãwẽ roa chinãyashõ ato vesõkõa, roa chinãyaí, chinã mekiyaí aká revoókatsavo”, iinã mato ẽ akávere.

Askáinã ẽ yoãtsikĩ, naíti chinã, yoranĩ tavananãti chinã aká ayashoro, tanatĩpá chinãyai, ichnárasĩ õsi õsipa meráoyarvi.

Nokẽ ana Yora Ivo nokẽ Papa anõsho nõ ravia. Askámẽkĩ anõshósevi nokenĩ yorarasĩ noke veí netãmtsãwasevi, Yové Koĩni ãwẽ yora vimaki aa keská akĩ ato ãwẽ shovimatismẽkĩ. Nĩkãwẽ, ana westísemẽki vana roapatõ ikí, roá vanã ikí akaya. Askátõ itãimai mã shokoi.

Ana askásevi, txiirviró. Ichnárasĩ õsi õsipa anõsho veárvi. Nokemẽ txiríasmẽkĩ noke keyoki ichná akaya. Taní ikítõ ikĩ noke keyoya.

Askámaĩnõ anaro aaivo yoini keskáma, wetsã rawe akatĩpárvi. Tasavaĩtĩpá, yamatiya.

“Takevó, yora ‘Yové Koĩni vanã ato ẽ yosĩnõ’, ikí ivo ashkã anõ kẽetsomároa. Aaro awesáma, noke yosin ikiyavo wetsarasĩ keskáma, chinãtsoma. Keyókaĩa shavapa Yové Koĩni anõ itimatõ ishõ nõ shokoa ivo oĩsho tavákepa ivõ akĩ noke yoãshokatsai.