Popular Bible Verses from ROMA 14

Share

Saba' Pakkaraengang Allataala gele passala kanreang na inungang, mingka passala kanabaang, dame salehangang na te'ne pa'mai' lalang ri Nyaha Tangkasa. Saba' inai jua anjampangi Almase lalang rita'ra appakonni, ia baji'i ri Allataala na rikangalikangi ri rupatau.

Saba' ampa attallasaki, injo ditte attallasaki tujunna Karaeng, na ampa mateki, injo mateki tujunna Karaeng. Jari, baji' tallasa iyareka mate, injo ditte anunnaki Karaeng.

Injomo saba'na maemuki a'boja apa nuappabattu injo dame salehangang na nurie' injo matu-matunna laassipakaterasa.

Injomo saba'na, andalaloki assihukkungi poleang! Mingka la'bi bajikangi kaui minahang ripanguppa inni: Andai ripaa'jari urang siana'ta a'dappe' iyareka tatto'ro!

Saba' rie' ta'ukiri: ”Saba' Nakke tallasa, appakonjomu pauna Allataala, sikuanna tau laa'kolantu'i ri a'rakangKu. na sikuanna tau laappakala'biri Allataala.” Appakonjomu sikuanna tau ri ditte ngase' laassare tanggongjawa' ripassala kalenna to'jua mange ri Allataala.

Tarimai tau lamma injo katappakanna manna gele lalagara panguppana.

Inai todo'ko, na muhukkungi atanna tau maraeng? Ia ammentengi, iyareka a'dappe'i, injo tanggonganna to'jua tau lapaa'jari injoi ata. Mingka ia latulusu ammentengi, saba' Karaeng a'kahasa lajaga tarrusui ripammentenganna.