Popular Bible Verses from ROMA 8

Share

Ditte konni-konnina riisse'i ma'nassana Allataala minahangi anjama lalang risikuanna laappabattu kabajikang mange ri iyai tungamaseang injo ri Ia, iamo intu mange risikuanna tau rikeo' injo assituru' surangang naha-nahanna Allataala.

Saba' kukajarreki ma'nassana baji' mate iyareka tallasa, baji' malaeka'-malaeka' iyareka sikonjo pamarenta, baji' nurie' rikonni-konnina iyareka rinularie' injo sallo', iyareka sikonjo kakahasaang, baji' nurie' injo rate iyareka nurie' rahangang, iyareka sikonjo mahallo' maraeng, gelei akkulle lapassisa'la'ki battu ripangamaseanna Allataala, nurie' injo lalang ri Isa Almase, Karaengta.

Appakonjo todo'i Nyaha Tangkasa lasokongki lalang rikalammaanta; saba' ditte gelei riisse', anteekamua sitoje'na ngera dowaang; mingka Nyaha Tangkasamo lapangera dowaangki mange ri Allataala surangang pa'nganroang nugele injo akkulle ripapau.

Injomo saba'na, apamo laripau ri sikuanna passala injo? Ampa Allataala rie'i riditte, inaimo labaliangki?

Ri appakonjonamo, konni-konnina gele sikalimo rie' hukkungang mange ri iyai turie' injo lalang ri Isa Almase.

Saba' a'ra'na rupatau inni iamo intu kamateang, mingka a'ra'na Nyaha Tangkasa iamo intu tallasa na dame salehangang.

Mingka lalang ri iangase'na injo la'bipa ditte battu risikuanna tau ambeta, kanara Ia maeng lakamaseangki.

Saba' kujarreki ma'nassana kamarasaiang rihattu konni-konnina gele akkulle ripassimpole surangang kala'birang nularipappijanjangang injo mae ri ditte.

Inaimo lalapassisa'lakangki battu ripangamaseanna Almase? Panja'ja' iyareka kamarasaiang iyareka pama'ri'-ma'risi, iyareka kalarakang iyareka kageleang make pakeang, iyareka bala iyareka pa'dang?

Na Allataala nulasalidiki injo batenta, laisse'i pattujunna Nyaha Tangkasa injo, iamo intu ma'nassana Ia, assituru' a'ra'na Allataala, ngera dowaangi tujunna sikuanna tau tangkasa.

Sikuanna tau, turiurang injo ri Nyaha Tangkasa'Na Allataala, iamo ana' ri Allataala.

Saba' sikuanna tau attallasa injo assituru' a'ra'na rupatau, nulapikkiri sikonjo passala nubattu ria'ra'na rupatau; sikuanna tau attallasa injo assituru' Nyaha Tangkasa, nulapikkiri sikonjo passala nubattu ri Nyaha Tangkasa.

Ia, tugele injo lapassayang Ana' kalenNa, mingka Ia lapassareangi mae ri ditte ngase', anteekamua lama'ring Ia gele lapasareang ngase' pangamaseanna mae ri ditte assurang ri Ia?

Nyaha Tangkasa injomo assa'bi surang nyahata ma'nassana dittemo ana'-ana'na Allataala. Ampa dittemo ana', dittemo intu languppa dahuang, battuanganna tau lanarima risikonjo nulasappattaang Allataala, nularitarima injo surangi Almase, iamo intu ampa sissaki surangang Almase, solanna ditte ripakala'biri todo' surangang Almase.

Saba' a'ra'na rupatau inni iamo intu passibaliang ri Allataala, saba' a'ra' injo gele tunru' mange ri hukkung Allataala; passala inni toje'i gele ma'ring mange ri ia.

Saba' sarro pa'bojana sikonjo mahallo' attajang hattunna ana'-ana' Allatala ripappijanjangang.

Saba' ditte riisse'i ma'nassana sa'genna hattu inni sikuanna mahallo' assurang-surangi a'nganro na assurang-surangi appisa'ring pa'risi pamana'.