Popular Bible Verses from متّانین رئوایت 5

Share

هچ کس، چیراق یاندیریب، اونی قابین آلتینا قویماز. چیراقدانا قویار کی، اِوده اولانلارین هامیسینا ائشیق ورسئن. بله‎ ده قویون سئزئن نوروز ائنسانلارین حوضوروندا اله شاخسین کی، یاخشی عمللرئزی گؤرسونلر و گؤیده‌کی آتازا حمد اله‌سئنلر.

سئز دونیانین نوروسوز. داغ اوستونده قورولان شهر گئزلی قالا بئلمز.

خوش اوره‌یی تمئز اولانلارین حالینا، چونکی اولار تارینی گؤره‌جکلر.

خوش صالحلئیه آج و سوسوز اولانلارین حالینا، چونکی اولار دویاجاقلار.

آمّا من سئزه دیئرم: دوشمنلرئزی سوئن و سئزی ائنجئدئب، اذئیّت ورنلر اوچون برکت دوعاسی اله‌یئن،

«خوش روحدا یوخسول اولانلارین حالینا، چونکی گؤیون پادشاهلیغی اولاریندیر.

خوش باریشی ساخلایانلارین حالینا، چونکی اولارا تارینین اوغوللاری دیئله‌جک.

خوش یاسلی اولانلارین حالینا، چونکی اولار تسلّی تاپاجاقلار.

خوش او آداملارین حالینا کی، صالحلئک اوچون سئتم چکئرلر، چونکی گؤیون پادشاهلیغی اولاریندیر.

خوش رحم اله‌ینلرئن حالینا، چونکی اولارا رحم اولوناجاق.

خوش سئزئن حالیزا او زامان کی، خالق منه گؤره سئزه یامان دیئب، عذاب ورئرلر، و سئزه هر جور بؤهتان وورورلار. سوئنئن و شادلیق اله‌یئن، چونکی گؤیده‌، اَجرئز بؤیوکدور. اونا گؤره کی، سئزدن قاباقکی پیغمبرلره ده بله عذاب ورئبلر.

خوش حلئملرئن حالینا، چونکی اولار یری مئراث آلاجاقلار.

سئز یر اوزونون دوزوسوز. آمّا اگر دوز دادینی اَلدن ورسه، اونی نه جور گئنه شور اله‌مک اولار؟ آرتیق هچ بئر شیه فایداسی اولماز، مگر اشئیه آتیلیب، ائنسانلارین آیاقلاری آلتیندا پایمال اولا.

بونون اوچون، گؤیده‌کی آتاز کئمی، سئز ده کامئل اولون.

آنجاق ”بَلئز، بلی“ اولسون و ”خِیرئز، خیر“؛ بوندان آرتیغی شرئردندئر.

اشئدئبسئز کی، دیئلئب: ”گؤزه گؤز، دئشه دئش.“ آمّا من سئزه دیئرم: شرئر آدامین قاباغیندا موقاوئمت اله‌مه‌یئن. کئم اوزوزون صاغ طرفئنه وورسا، او بئری طرفئنی ده چوئرئن.

اگر صاغ گؤزون سنی پئس یولا چکسه، اونی چیخارت و اؤزوندن آت‌‌‌ گتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان داها یاخشی‌دیر. اگر صاغ الئن سنی پئس یولا چکسه، اونی کس و آت‌‌‌ گتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان چوخ یاخشی‌دیر.