उनकु जोजोम अनाः जोम तयोम, ईसु ता सिमोन पतरस के मेताःदेयाय, “जोहन रिई होपोन हेरेल सिमोन, जेतना दुलार नोकु इञ एते दोहोय कनाकु, चिलि आम इञ एते ढेर दुलार दोहोय कनाम?” पतरस ता ईसु के मेताःदेयाय, ए परभु, आम सारीइ कनाम चि, “इञ आम के दुलार मिकानिञ।” ईसु ता पतरस के मेताःदेयाय, “इञ रेन मेमना अतिञकुम।” ईसु ता अरो मिसा उनी के मेताःदेयाय, “सिमोन जोहन रिई होपोन हेरेल! इञ के दुलार एञकनाम?” पतरस ता ईसु के जबाब एमाःदेयय, “ए परभु! आम सारीइ कनाम चि इञ आम के पेयार मिकानिञ।” ईसु ता पतरस के मेताःदेयाय, “इञ रेन भेड़ी के नेलअतेनकुम।” ईसु ता अरो मिसा पतरस के मेताःदेयाय, “सिमोन जोहन रिई होपोन हेरेल! चिलि आम इञ के पेयार एञकनाम” पतरस ता नियां गानाम रे दुःख एनाय चि ईसु ता पतरस के पेय इसा नुवां कुलिदेयाय, “चिलि आम इञ एते दुलार दोहोय कनाम?” पतरस ता ईसु के मेताःदेयाय, “हें परभु, आम सुबिन्नाः सारीइ कनाम, आम सारीइ कनाम चि इञ आम एते पेयार दोहोय कनिञ!” ईसु ता पतरस के मेताःदेयाय, “इञ रेन भेड़िकु के अतिञकुम।”
