Popular Bible Verses from Romanfoɛ 12

Share

Nnɛmɔ maa wiase ne kyire ɛmɔ bɔ ɛmɔyɛ ɔ, mmom ɛmɔyɛ ɛmɔ adwene foforɛ, kyɛbɔ ɔkɔyɛ a ɛmɔ konwu bɔ Nyameɛ kuro, bɔ ɔte pa, bɔ ɔsɔ ye nye, na odi mu ɔ.

Yeti aliemaa mɔ, anwunvoin bɔ Nyameɛ anwu yɛ nati, mesrɛ ɛmɔ kyɛ ɛmɔfa ɛmɔ nipadua ne bɛbɔ afɔleɛ bɔ ɔte ase, ɔte krongron, na ɔsɔ Nyameɛ nye. Na mmerɛ bɔ ɛmɔfa ɔsom bɔ ɔte krongron bɛma ye ne, ɛmɔfa ɛmɔ adwene bɛsusu nningyein nwo yé.

Ɛmɔli ahurusi wɔ anidasoɛ nanu. Ɛmɔmia ɛmɔ nye begyina amanehunu nu. Ɛmɔbɔ mbaeɛ daa.

Nnɛmaa bɔne di wɔ so ngunim, mmom fa pa di bɔne so ngunim.

Ɛmɔdodɔ ɛmɔ nwo kyɛ aliemaa mɔ, na ɛmɔli moa bɛfa nidie bɛma ɛmɔ nwo.

Nnɛmɔ maa nyaatwom ba ɛmɔ dɔ nu. Ɛmɔhyi bɔne, na ɛmɔ bata pa nwo.

Sɛ ɔkɔyɛ yé a, ɛmɔ de, ɛmɔbɔ mmɔden kyɛ ɛmɔ ne ebiala kɔtena asomdwie nu.

Nniema mɔ, nnɛmɔfa bɔne betua bɔne so kerɛ; mmom ɛmɔyakyi bɛma Nyameɛ yaa ne; ofikyɛ bahworɔ kyɛ: “ ‘Me yeɛ metua bɔne so kerɛ ɔ; na ngotua so kerɛ,’ Awurade yeɛ waha ɔ.”

Ɛmɔyere ɛmɔ nwo bɛyɛ adwuma, nnɛmɔyɛ akwadworɔ. Ɛmɔyɛ hye honhom nu, ɛmɔsõ Awurade.

Na ɔnate adom bɔ bafa balo me nati, meka mekyire ɛmɔ nu biala kyɛ, nnɛmaa obu ye nwo kyɛ odi mu tra so. Mmon onya anwobraseɛ adwene, kyɛbɔ gyidie bɔ Nyameɛ asusu ama ɛmɔ ne te ne.

Sɛ ebie yɛ ɛmɔ bɔne a, nnɛmɔyɛ bie betua ye kerɛ. Bɔ ebiala nwu ye kyɛ ɔte pa ne, ɛhene yeɛ ɛmɔma ye nwo hia ɛmɔ ɔ.

Adwene bɔ ɛmɔle ye wɔ ɛmɔ nwo ne, ɛmɔnya bie bɛma ebiala; nnɛmɔma ɛmɔ nwo so, mmom ɛmɔyɛ adwuma bɔ ɔba ase. Nnɛmɔ nya adwene kyɛ ɛmɔ ngome yeɛ ɛmɔse nworɛ ɔ.

Mmom, “sɛ ɛhɔen ku wɔ tamfo a, ma ye aleɛ ma oli; sɛ nzuhɔen ku ye a, ma ye nzue ma ɔno. Sɛ ɛyɛ sɔ a, né ɛboɔboa see noa gua ye ti afia.”

Bɛ bɔ bɛtane ɛmɔ nye ne, ɛmɔhyira bɛ. Ɛmɔhyira, nnɛmɔ dome. Bɛ bɔ bɛ nye agye ne, ɛmɔ ne bɛ li ahurusi; bɛ bɔ bɛsu ne, ɛmɔ ne bɛ su.

Ɛmɔboka akrongronfoɛ ma bɛ sa ha bɔ behia ɔ. Ɛmɔsõ mmenia wɔfoɛ.

Na kyɛbɔ yɛ nipadua ne te kõ, nakoso ole akwaa pee, na akwaa namukoraati koso nnyɛ adwuma kõ ne, sɔ ala yeɛ yɛ koso, ɔwɔ nu kyɛ yɛsone, nakoso yɛte nipadua kõ wɔ Kristo nu, na yɛ nu biala te nipadua n'akwaa.