Popular Bible Verses from Efesus 6

Share

Nono kuda bunga i, yoba bogl kuda boglkunga. Nono Satan ya murubuglo kide ye duglo beglkwa i bogl, ye meglmara kuda bunga. Murubuglo kide i, tau kagno podo paugo, tau yobuglno podo paugo, erukwa. Te, murubuglo kide i ye yoba mim erumara meglkwa i ye yoba i bitno moglsre, kide kaima meglkwa. Nono yoba kide i bogl kuda bunga pre diga.

Ana ene kuda kugugl gagl mudu edidre, ama God Murubuglo ene nomane tenabere i kamage kane kane, ege ege erio. Te, ene kamage eraiglkwa i, oglka erekre, God yobama mudu ake ple di tenabedi kamage ere te molo.

God kuda kugugl gagl norukwa i mudu edio. Edibi, Satan konbo kane kane mina u ene kinano sidre, bakagl tenabuka ba ene yage sikre, adigl giglede moraiglkwa.

Nono yoba i bogl kuda bunga pre na ene yegl di teiga, soldia kuda kugugl gagl mudu ede kodidre, ede kuda wagle eimere yegl, ene ama God taragl wakai kane kane ere norukwa i poglo di prisre, ede kuda wagle enaiglkwa. Ene yegl eribi, yubun ya taragl kide kane kane ene meglmara unabuka ba ene ta yage sikre, adigl giglede meglbi, ege kide i dudunabuka igne pra, ene ama giglede adigl mogl pai moraiglkwa.

Ene yegl ersre, God kamo kaima pre mediglkwa i pre medigl pai moraiglkwa paugwa. Yoba yer gaiglkwa, de bauglo ere paugo, simere mere yegl, Satan kuno yegl ere, ene ere sinagledi erabuka. Ba soldia awagle bogl, atne meglmere mere yegl, ene God kamo pre medigl pai meglbi, awagle mere yegl bogl tenan, yer i awagle mina sidre, goginabuka. Te, soldia ain bitno gagl edimere mere yegl, God ene ere i kodugwa i, ene poglo di pre molo. Pre moglsre, God Murubuglo bainet ta norukwa i ake gi di molo. God Murubuglo bainet ta norukwa pre diga i, God kamo i pre diga.

Ana ene yegl ere, adigl giglede moraiglkwa. I siragl pre nono kamga, soldia tabre wan u ikne ikne pi, kuda eramnedi kumagl deimere mere kuno yegl, ene God kamo kaima yogwa i, ege ege poglo di prisre, wan moraiglkwa. Te, ye ain ta pitno wagle padiglmere yegl, ene ama God nono yoba du meglmedi kanugwa i poglo di pribi, ene kugl bogl tenan, wakai moraiglkwa. Te, soldia ere mogl, su giglede edidre, kuda eramnedi ake kun erimere kuno yegl, ene ama Jisas kamo wakai yoba prisre, God bogl deno muduno swara yenaiglkwa pre dugwa i, ege ege yoba di tenamnedi ake kun ere moraiglkwa.

Agroma abaroma wagle, ka dudumara yegl paugwa, nono Yaglno Kade suna munara yobuglo idre, yobuglomo pai kawa tomara ama yobuglo io.

God lomo ta okna dugwa i, yegl dugwa, Ene neno mano moraiglmara mogl atne edidre, kano prio! dugwa. God lomo paimara i, lo swara i pamara God komono kana ka kaima ta ama akie di te paduglkwa. God komnayene lo swara i mina ka kaima akie di paduglkwa i, yegl paugwa, Ene neno mano moraiglmara mogl atne edidre, kano pribi, ene mogl pai eraiglmara wakai mogl, makandigle tau kanana moraiglmiwe dugwa.

Ana ene gak meglkwa i, Yagl Kade ene eraiglmedi prukwa i, ene neno mano kano prisre, duglo boraiglmedi prukwa. Yegl pre ene yegl eraiglkwa swara i kuno erabuka.