Popular Bible Verses from Ka Di Poglkwa 3

Share

Ene prio! Na yugu dua mina adigl mogl, dua sidre, ene agle di moglka mere yegl paugwa. Yoba ta na agle diga i prisre, yugu dua yauro edenan, na ede yugugl unaglka. Wibo, na yoba i bogl ame di mogl, kaya mokna akie nenabuglka.

Ene mabuno siragl mere erikwa i, na pre kan eriwe dugwa. Na prika i, ene na mabunona kaima eramnedi prikrikwa ba ene ama na mabunona mudu kide kodokrikwa. Ene suna suna mere yegl meglkwa. Ene yegl meglkwa i, ene nigl dogwa mere yegl moglkre, nigl kor mere yegl ama moglkrikwa ba ene nigl gagl i meda edigwa, bi yomere mere yegl meglkwa. Na prika i, ene na mabunona kaima eramnedi pribi, i wakai panabuka, te ta manan, ene mudu kide kodinaiglkwa paugwa. Ba ene suna suna meglkwa i, na kide prika pre yoba nigl kobugl kar simere mere yegl, na ene sedinaluwe dugwa.

Ene prio! Na dena muduna teiga yoba i ta aglau erikwa igne, na ye ka tedre, ye ere si di iga. Yegl pre ene nomano yake tedre, na pre di yar edigwa i kide kodo, nigl dogwa mere yegl molo! dugwa.

Ene mabuno siragl mere erikwa i, na pre kan eriwe dugwa. Na pre kan erika i, ene yoba mere ta moglkrikwa te yobuglno podo paikrukwa ba ene na kana duglo beglkwa. Te, na kagna i ama ene mane dikre, mokono narekrikwa pre ene wakai erikwa. Yegl pre ene kanio! Ene na kogona eraiglmedi na dua ta ene yauro teiga. Yoba ta udre, dua i yogramnedi eribi, kuno ta erekrabuka.

Yoba ta kuda yobuglo erabuka i, na yoba i pra we di tebo, siana king mina akie ame dinabuglka. Na kuda mina yobuglo ersre, Nina siamo mina na Nina bogl akie ame dubuglere yegl, na yoba i bogl akie ame dinabuglka pre diwe di, Yagl Kade yegl dugwa.

Yagl Kade ye Laodisia yoba pre ka yegl didre, ama yegl dugwa, Ene digwa i, No mige moni ya bona gana mere kide pai norukwa pre taragl swara ta inamga i ta paikrumiwe digwa. Ene yegl digwa ba ene goduglme mere yegl moglsre, yoba kide kaima meglkwa i, ene ta pre kan erekrikwa. Ene gumuglno ama kin yogo, yokoko meglkwa.

Yagl Kade ye pre mediglkwa yoba dumo Filadelfia makai si meglkwa i pre ka yegl didre, ama yegl dugwa, Yubun ta unan, ene adigl gigledi molo dimere yegl, ene erikwa pre ege kide ta makandigle yoba mudu meglmara unabuka i, ene suna mogl, yubun akie i dinaiglmedi ere tenaluwe dugwa. Makandigle yoba mudu ta eribi kanagledi ege kide i dedibo, ye mudu meglmara unabuka ba ene meglmara ta ukrabuka pre diga.

Na ede ikne unaglka i, magigl erukwa pre ene na mabunona erikwa i, ake gi di molo. Ake gi di meglbi, yoba swara ta ene praisno i eglke edenaiglkwa i, kuno erekrabuka.

Te, ene mabunono i, na Godna gumuglo mina kuno erekrukwa. Yoba ta doga ere gaglsre, ugl paugo, eduer suna doga i goginagledi erumere yegl mere, ene mabunono wakai i, ama goginagledi erukwa pre ene adiglsre, ede tau i tebe ede galo!