Popular Bible Verses from Juãw 2

Share

Nhũm Jejus kormã mẽ kãm aa mẽ kot mẽmoj pumunh kêt õ ho anhỹr kêt tã krĩ pê Kanã kamã ã mẽ kãm amnhĩ nhĩpêx anhỹr o hkrax. Jao amnhĩ to rax o amnhĩ to rax ã mẽ inhmã amnhĩ to amnhĩrĩt. Pa mẽ ixpê hkôt ri ixpa xwỳnhjaja ã kot amnhĩ nhĩpêx anhỹr ã omu hãmri nẽ kêp Tĩrtũm kot mẽ pakaxyw ãm xwỳnh ã omunh kurê kumrẽx.

Hãmri nhũm kãm: —Tôe. Kwa tee ri ajamaxpẽr kêt nẽ. Kot paj tanhmã mẽ kãm ho. Nom kot paj kormã ixpê Tĩrtũm kot mẽ akaxyw ixãm xwỳnh ã pa kormã amnhĩ to amnhĩrĩt kêt nẽ. Anẽ.

Hãmri nhũm Jejus tẽ nẽ omu mẽ àpênh xwỳnhjê mã kãm: —E mẽ ma mra nẽ gô ru nẽ ho poti kuhê mũj piitã ho nỳt pa. Anẽ. Nhũm mẽ kuma nẽ ma mra nẽ ho nỳt pa. Hãmri nhũm mẽ kãm: —Nà hãmri. Pãnhã hõ kamã gô hkwỳ janhi nẽ o tẽ nẽ mẽ anhõ patrãw mã agõ kê hkwỳ ho ixkõ nẽ kamã ama. Anẽ. Hãmri nhũm mẽ mar xà hkôt kãm hkwỳ janhi nẽ hwỳr o tẽ nẽ kãm kugõ.

Hãmri nhũm mẽ kuma nẽ mẽ kãm amnhĩ jarẽ. Nom amnhĩ tã kuxi nẽ mẽ kãm awjarẽ nẽ mẽ kãm: —Nà kot paj aa mẽ ate mẽmoj pumunh kêt õ ho pixi nẽ mẽ amã ho anẽ ka mẽ omu. Tĩrtũm nhõrkwỹ jaa. Kot kaj mẽ agrà pa ixtã apkati axkrunẽpxi nẽ akupỹm hipêx ka mẽ ja hã ixpumu.

Hãmri pa mẽ Jejus kôt mẽ hwỳr agjê nẽ ja hã mẽ omu hãmri nhũm Jejus pê ja omnuj tỳx nẽ. Jakamã nhũm tee ri mẽ omu hãmri nẽ amnhĩm mry hkà ho mẽ htak xà nhĩpêx nẽ ho ixkreja nê mẽ piitã mẽ kator pa. Nẽ môx nẽ ôwêhti nẽ mẽmoj piitã kator pa. Nẽ kàxpore ho pinhĩpanh xwỳnhjaja nhũm mẽ kêp mẽ õ mêsti rẽnh pa nhũm mẽ hikàxpore pykap rôrôk pa nẽ anhgrà nẽ hikwỹ. Hãmri nhũm Jejus tutre ho wẽnê xwỳnhjê mã kãm: —Kwa mẽ anhõ tutre jamỳ nẽ tokyx ma mra. Na htem Inhĩpêêxà nhõrkwỹ kamã mẽmoj to wẽnê hkêt nẽ. Kêp mẽ ujaprôr xà hã ixkre hkêt. E kwa mẽ tokyx ma mra. Anẽ. Nhũm pre ã mẽ kãm kapẽr anẽ nhũm mẽ tee ri kuma hãmri nẽ ma mrar kurê kumrẽx.