Popular Bible Verses from Mateo 5

Share

Cuaquijiji sisi capaca ajja. Chojja. Cuaquijiji sisi nequia cajji acui biajje, ojjaña equijo ani cuana jeajaꞌajji. ¡Jiquio ecua cuaquijijiya ojjaña equijo ani jeajaꞌa cani jayojja jama quea pame nee baꞌecue! Jamajjeya miquianaya quea pame ba majje pea cuanaa Eyacuiñajji, esejaya Chii eyajo bihuia cajeꞌyo —Jesosa poanaje.

—Enijje jjapeequianijo miquianaya cuaquijiji jama. Cuiñajji emaco aoꞌaojo nequi ba caje cuaa quea huesha nee mecajje peaꞌai. Jiquio ecua emacojo nequia jama ecuea epeejjiya pea cuana Eyacuiñajji ba meesahua cajeꞌyo enijje jjapeequianiya jjejojo.

Ojaya epeejji cuana mimishi cuana aꞌajjajo Eyacuiñajji nijje baꞌe tiitiijeꞌyo. ¡Quea bihui nee capoꞌyahua oya cuana!

—Ojaya epeejji cuana Eyacuiñajjija esohui jayojja jama a sa neinei poanijo, Eyacuiñajjiya oya cuana quea jaji nee nee baꞌe meesahua cajeꞌyo. ¡Quea bihui nee capoꞌyahua oya cuana!

Ecuea esohui eyacua ca ca jama baꞌa —Jesosa poanaje—: ¡Miquea epeejji pojjeama quea jea nee acue peaꞌai! Miya Eyacuiñajjija epeejji poanijo, miya napa cajje ¡Eyacuiñajji nijje mimicue maa mi napajji poanijo! Jamajjeya eꞌe pojjaꞌa oya cuana Eyacuiñajji nijje jjapeequijeꞌyo peaꞌai.

—¡Bacue! Beca cuana jjashahuabaquiani jama baꞌa: “Eꞌe, de, eya quea mimishi nee. ¡Eyacuiñajjiya ecuea mimishi cacuijea caꞌyahua!” Jamaya jjashahuabaquianijo Eyacuiñajjiya oya baꞌe tiitii mee cajeꞌyo onijje eyajo. ¡Oya cuana quea bihui nee capoꞌyahua!

Ojaya epeejji cuaa pea cuana quea bei po meesahua canijo, ojjañaja eba oya cuana Eyacuiñajjija bacua cuana eꞌe jojo nei; quea pame nee.

Oja epeejji cuana mimishijo quea yeno poanijo, Eyacuiñajjiya quea bihui nee po mee cajeꞌyo mimishi cuijea caꞌyajje.

Ojaya epeejji cuana quea jaꞌa nee baꞌyanijo, onaaya oya cuana cuia cajeꞌyo. ¡Jamatii oya cuana quea bihui nee capoꞌyahua! Eꞌe, quijje eyajo oya cuana ojjaña huoojeaꞌyojji enijje poajeꞌyo —Jesosaa huohui canaje.

—Ojaya epeejji cuana pea cuanajo jjashahuabaquiani pea jaahuanajji. Jamaya poanijo pea cuaa, Eyacuiñajjiya peaꞌai oya cuana jaahuana cajeꞌyo. Tecueꞌama poajeꞌyo ona nijje. ¡Eꞌe jojo nei quea bihui nee capoꞌyahua ojaya epeejji cuana!

Majoya Jesosa Quitohua ojaya epeejji cuana huohui canaje jama baꞌa: —Miquianaya ecuea epeejji poanijo, pea cuana minijje mimijajije; miya napa caje peaꞌai, siajje poaje mijo peaꞌai. Jamatii Eyacuiñajjiya miquianaya quea bihui nee po mee cajeꞌyo. Eyajo onijje baꞌe tiitii mee cajeꞌyo. Eꞌe, Eyacuiñajjija esohui huohuijji yahuajo nei nei baꞌya poa cuana jamaya aca poa mimishi cuaa; napa ca poa peaꞌai. Jamajjeya ¡ona jayojja jama pocue, quea bei! Eyacuiñajjiya miquianaya ojee baꞌe mee cajeꞌyo tiitii eyajo quea bihui nee nee —Jesosaa huohui canaje.

Ojaya epeejji cuana quea bei poani Eyacuiñajjija quea jea nee; onijje baꞌe tiitii mee cajeꞌyo. ¡Quea bihui nee capoꞌyahua oya cuana!

—Ecuea esohui jayojja jama añajo, pea cuana mi jayojja jama baꞌeje quea pame nee peaꞌai. Jamajjeya miya sane jama, mei sese jama. Mei seseya shicui cajje bobi ihuiꞌyo ajja poani. Jamatii mei sese seseꞌama poa jojjemo ¿aꞌa quea sese po meeje oꞌoya? Chojja. Seseꞌamajo quea huesha jeajeaꞌaña seya. Jiquio ecua sane seseꞌama jeajeaꞌaña seya jama miya ecuea esohui jama po ajjajo, cajaa achanaꞌ eyaya.

Jamajjeya esejaya Chii eyajo quea pame nee ani. Ojjaña cuana Eyacuiñajjija quea jea nee nee. ¡Eyacuiñajji jayojjaya jama pocue quea bei nee nee! —Jesosa poanaje.

Jamajjeya huohuicue jama baꞌa: “Eꞌe, eyaya jama ajeꞌyo”. “Chojja eyaya jama aꞌajja” acue —Jesosa poanaje.

—Miquea eba Moisesija etehueꞌyo jama peaꞌai baꞌa: “¡Peaa cojja cuiasejjajea cajje jjasosequiaquicue; cojja cuiasejjajea peaꞌaicue! ¡Peaa seꞌ cuiasajajea cajo seꞌ cuiasajajea peaꞌaicue!” Ecuea esohui eyacua ca ca jama baꞌa: Onaaya miya napa cajje ¡aꞌa jjashahuabaquijji onijje ejjasoseaquijji! ¡Mique shemo ebianei mijijje cuia cajje shemo shani mijijje cuia mee oꞌoyacue!

Jamajjeya ¡aꞌa quea mimishi pojji! Miya quea mimishi poani epona, aquiana pojjaꞌa baqui majje ¡maya bapajeaꞌyocue! Jea ba majje mimishi po majamajañajo cuaqui yasijje dobiquijeꞌyo tii. Jamajjeya ¡aꞌa jea bajji! Peaꞌai miya quea mimishi poani aquiana emeya napañajo ¡aꞌa aquiana napajji! Quea mimishi po chanaꞌ; cuaqui yasijje dobiquiꞌyo chanaꞌ. Jamajjeya ¡aꞌa onaja aquiana napajji! Sii chanaya —Jesosa poanaje.