Popular Bible Verses from Iuwãu 16

Share

Miꞌi hawyi Iesui toꞌe -Eimosoꞌopot kahato hanuaria yt uimohey i haria tukupteꞌen aru maꞌato yt eweikenꞌẽ teiꞌo iꞌatupupi katupono iꞌatupyhyp hat Uito areineꞌen iꞌatumoperup i hat Uito miꞌi pote eiwesaika ro uhete e. Wuatꞌi kat koꞌi kat koꞌi ahenoi raꞌyn ehepe eimoesaika hamuat eimowepiit hamuat. Eimowepiit hat sese Uito e. Yt eiwanetup koꞌi koꞌi teiꞌo katupono atiꞌatuꞌakit akit aru yne yne ahewanikaptia e. Hoꞌopot hap putꞌok e ehetiat turan yt paa eweiꞌe sese teiꞌo eipyꞌa pe eiwanetup hawe katupono yt karãpe i worohoꞌoꞌatoiat sese e Iesui topotmuꞌeria pe.

Meiũran ti aru tuut Tupana Paꞌãu ehewowi pywuat sese sehay yne moherep hamo. Miꞌi ti aru henoi yne yne pywuat sese etiat ehepe e. Tuwehay pyi yt ihay i. Uiꞌe hap yn ihay aru e. Tupana Paꞌãu timoherep aru ehepe kat aru kat aru toineꞌen hap toiꞌatumoherep ehepe Topaꞌãu pywuat sese wo e.

Haꞌawyte pyi ti uhepe yn ewehẽtup eimikyꞌesat koꞌi maꞌato koitywy pyi aru waku ewehẽtup Uiꞌywot pe uhet wywo uimikyꞌesat ewy. Miꞌi hawyi Uiꞌywot tum aru eimowepiit sese hamuat e. Ewehẽtup miꞌi tã hap ewy pote eweipuẽti aru eimiẽtup eimowepiit kahato hamuat e.

Pywo pe ti areꞌe ehepe meiũpe yn areineꞌen pote ti ren yt tuut i eipowyro pakup i hamuat Tupana Paꞌãu maꞌato areto meiũpe pyi pote ti aru atipoꞌoro kuap eipowyro pakup i hanuat e. Mio tã e aru Tupana Paꞌãu wuatꞌi miitꞌin me -Eiperia wyti torannia Tupana piat iꞌaparap haria e putꞌok toꞌe hawyi. Tupana yn ni eimohãpyk kuap hat e ti aru wuatꞌi miitꞌin me. Taꞌi yt nakuap i nug haria ti Tupana tiꞌatusatyꞌi satyꞌi kahato hamuat e miitꞌin me Tupana Paꞌãu putꞌok toꞌe hawyi e Iesui.

Miꞌi hap ewy ti mesup areto hamuat raꞌyn eiꞌyatypepyi miꞌi pote yt eiwepiit hin i maꞌato meiũran worohoꞌopuẽti i raꞌyn hawyi ti aru maꞌato meremo raꞌyn eiwepiit hap tuut aikotã aity iwepiit aiꞌywãꞌĩ hap eꞌat pe hap ewy e. Aremoherep i raꞌyn eipyꞌasetpe hawyi eimowepiit sese hap topyhuꞌat eiwepiit sakpo hap ewy aikotã imepyt pakup hap ewy are. Areineꞌen i eiwywo hawyi eiwepiit sese hap toineꞌen eipyꞌa pe iheg me toineꞌen yt uwe i raꞌyn eiwepiit hap porap kuap hat e. -Koitywy yt ewehẽtup kuap i te uhepe eimikyꞌesat koꞌi maꞌato areto hawyi ewehẽtup kuap uhepe e. Maꞌato ti aru putꞌok e eipowyro pakupꞌi hanuat Tupana Paꞌãu. Miꞌi hawyi waku ewehẽtup Uiꞌywot pe eimikyꞌesat koꞌi -Tupana eweiꞌe o Esaꞌyru Iesui e hap het rakat mohey haria uruto eweiꞌe o. Miꞌi hawyi uhet upi tutum ehepe kat koꞌi kat koꞌi eimiẽtup oktan uimikyꞌesat nug wywuat pote e.

Pywo pe ti areꞌe meiũran ti aru eiwoꞌokakꞌi Uito yt uwe i pote maꞌato iraniaꞌin yt uimohey haria i ti aru iꞌatuwepiit neꞌi raꞌyn e. Iꞌatuwemowepiit hap ete ti aru eipe yt eiwemowepiit hin i e. Miꞌi rẽ ti aru maꞌato meremo tokosap yt eiwepiit i hap hawyi ti aru meremo eiwepiit i raꞌyn e.