Popular Bible Verses from Luca 8

Share

Amnho hã ti'ai wẽ wa, te te i'anhamra mono hã, aimawi a'uwẽ, te wasu'u. Ta norĩ hã ãté te za tipo're na te te 're wapari za'ra, 'Re ihâimana u'âsi mono zadawa wasu'u hã. Tawamhã te za te te 're 'madâ'â pese za'ra. Õne haré, te za isimiroti na 're nomro. Tawamhã rob'rã i'rãi wẽ uptabi ne, hâimana wẽ uptabi na, te za oto 're hâimana za'ra. Ãne amnho potozé wasu'u na, wa aima ãma simiré'é za'ra wa'wa.

Duré amnho hã wab'ru wazari i'a'a mono hã, aimawi a'uwẽ, te wasu'u. Ta norĩ hã ãté te za taré tipo're na te te 're wapari za'ra, isadawa wasu'u hã. Tazahã, marĩ wamhã, õhõ ãma si 're nomro mono õ di za. Ãté, marĩ na si te za te te 're rosa'rata za'ra sima, ãté rob'uiprazém na si, ãté titozém na si. Tawamhã rob'rã i'rã wẽ prã ne, 're hâimana wẽ uptabi za'ra mono õ di za.

Duré amnho hã ẽtẽ nhisiwi irere'e mono hã, aimawi a'uwẽ, te wasu'u. Ta norĩ hã ãté te za 'Re ihâimana u'âsi mono zadawa wasu'u hã te te 're wapari za'ra, tipo're na. Tawamhã te za iwasu'u ma 're to za'ra. Tazahã, õne haré te te 're saze za'ra mono õ di za. Ãté, te za te te 're saze hutu za'ra. Ãté rowasédé hã da te tãma 're 'manharĩ za'ra mono õ'umnhasite, te za apâ 're sipizari za'ra.

Tawamhã tisiré 're inomro mono norĩ ma, te tinha, ãne: — E niha bâ asiwi ĩ'umnhasi aba õ di. Tahawa, te sima nharĩ za'ra, ãne: — E niha õ hã aibâ, rowa'u'u ma, te te nharĩ wamhã, ma tô rowa'u hã sazâ. Duré, â nhibzaihâ ma hã, te tinha. Tahawa, ma tô ti'âtu. Imreme hã ma tô wapari zahuré. Mreme pire wa, ma ãma titob'uzu za'ra. Õne hã tãma sa'rese za'ra õ wa, ma tô tãma tipahi za'ra, isiré 're inomro mono norĩ hã.

Amnho hã bâdâdi zababa irere'e mono hã, aimawi a'uwẽ, te wasu'u. Ta norĩ hã ãté te za isadawa wasu'u hã taré tipo're na te te 're wapari za'ra. Tawamhã te za Wa'uburé hã itẽme 're sihutu ãté, te te tãma 're roti za'ra mono da, te te 're saze za'ra mono tõ da, te te 're sõ'reptu za'ra mono tõ da, 'Re ihâimana u'âsi mono hã. Tawamhã wa'rui'wa nhimiroti zarina, te te saze za'ra õ di za, 'Re ihâimana u'âsi mono zadawa wasu'u hã.

Tane, ĩmreme hã a'â te dama iwaihu'u'õ hã te za niwapsi waihu'u za'ra ni. Tahawa, wa tô rob'uiwẽzém na ãne ãma simiré'é.

Tawamhã ma tô pi'õ hã sina wapa, Zezusihi mreme hã. Da te waihu'u ãna, sãmra õ di oto, pi'õ hã. Ãne ma tô sina waihu'u. Tawamhã rẽrẽ'ẽ sina, ma tô Zezusihi papara aime hi'rãtitõ. Danho'a te Zezusihi ma siwasu'u pese, ãne: — Ĩhâzé wa, wa ai'uza aiwi upi, ĩpese da. Tawamhã awa'awi wa tô séptârâ. Tawamhã Zezusi te tãma tinha, ãne: — Ĩhidiba, za te aipesezém na ĩ'umnhasi wa, ma tô aihâzé hã aima apa. Rowẽ na te za oto 're aimo.

Tahawa, ma Zezusihi u tiwahutu za'ra, te te siwi utu da. Tawamhã ãne te siwi 'mahâ: — Rowahutu'wa, rowahutu'wa, wa za ai'utõrĩ ni. Tawamhã Zezusi ma tô udu. Duré ma tô wahudu hâiwi. Rowa'u'u ma, te tinha, te te sazâri da. Duré â ma, te tinha, âtu da. Tahawa, ma tô sazâ, rowa'u hã. Duré ma tô ti'âtu oto.