Popular Bible Verses from Juan 17

Share

Camic queꞌapartiꞌij, tachꞌachꞌojirsaj ja canma tre ja ratzobal como ruqꞌuin ja ratzobal nkatzꞌat wiꞌ nak ja kas mero abanic ja katzij chi at Dios.

Ja utzlaj cꞌaslemal ja mta qꞌuisic trij quewaꞌ rbanic riꞌ, ja winak tok cotak janiꞌ ja ranaꞌoj atat ja xa ayon chi ni katzij wiꞌ chi at Dios in tok cotak janiꞌ nnaꞌoj anin ja rin Jesucristo ja rinatakonto waweꞌ chwachꞌulew jariꞌ cucꞌan ja utzlaj cꞌaslemal ja mta qꞌuisic trij.

Pro ma queyon ta ejeꞌeꞌ nmajon rbanic oración pa quicuenta como ejeꞌeꞌ nqueyaꞌ na nbixic chique juleꞌ chic in rmal ja xtiquibij ecꞌo chi na juleꞌ ja xtiyukeꞌ na quecꞌuꞌx wqꞌuin in camic nban orar pa quicuenta ejeꞌeꞌ chakajaꞌ. Camic nban pon orar pa quicuenta utzcꞌa chi xta jun xtiqueban canojelal ja winak ja nyukeꞌ quecꞌuꞌx wqꞌuin caniꞌ kabanon ajoj awqꞌuin Nataꞌ como atat xa jun abanon wqꞌuin in xa jun nbanon anin awqꞌuin chakajaꞌ. Ja kas ngana anin xta jun xtiqueban kuqꞌuin canojelal utzcꞌa ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ xtiquinimaj chi atat attakyonto wxin.

Ma ja ta ncꞌutuj chawe chi neꞌawasajel waweꞌ chwachꞌulew xquebe ta awqꞌuin camic riꞌ, ja nwajoꞌ chawe chi neꞌaban cuenta waweꞌ chwachꞌulew utzcꞌa chi maquechꞌac rmal ja ritzelal.

Caniꞌ ayaꞌon chwe chi bien kꞌalaj chi atat atcꞌayon ja ncꞌaslemal in queriꞌ nbanon anin chakajaꞌ, nyaꞌon chique chi bien kꞌalaj chi atat atcꞌayon ja quicꞌaslemal ejeꞌeꞌ chakajaꞌ. Queriꞌ nbanon chique utzcꞌa chi xta jun xtiqueban ja caniꞌ kabanon ajoj awqꞌuin como xa jun kabanon. Quewaꞌ neli riꞌ, anin xa jun nban cuqꞌuin in atat chakajaꞌ xa jun naban wqꞌuin utzcꞌa tok xtiqꞌuiswani mta ariꞌ ja maquita jun nqueban. Queriꞌ nwajoꞌ utzcꞌa ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ xticotakij na chi atat attakyonto wxin utzcꞌa chi xticotakij na chakajaꞌ chi congana neꞌawajoꞌ ja winak ja xa jun quibanon wqꞌuin ja caniꞌ abanon chwe como congana ninawajoꞌ.